Newcastle tan Etihad Stadium tlawhna hun ṭha

Newcastle United-in zanin dar 12:30 hian Etihad Stadium-ah Premier League champion lai Manchester City an tlawh dawn. Eddie Howe hnuaiah Magpies-in hma an sawn a, tun hi inhliam leh transfer vanga la insiamrem lo Man City hmachhawn hun tak a ni.

Sulhnu thlir kir chuan Man City hian an mualah league match 14 chhung Mapgies hi an hneh tawh a, goal 48 zet khungin goal sarih chiah an chhuah. An muala club khat an hneh zawn rei ber a ni a, Mapgies tan pawh khualmuala team pakhat an hneh loh zawn rei ber a ni bawk.

Mahse, Magpies hi season liam ta aṭang khan Eddie Howe hnuaiah an insiamṭha lehzual. Tun season match hmasa berah pawh Newcastle United hian team ṭha tura ngaih Unai Emery kaihhruai Aston Villa chu 5-1 in an sawp.

Tlarhmaa awm Alexander Isak hian talent a nei ṭha a, kum 23 mi Isak hian season liam ta khan hliam vanga match 16 chhung a khel lo chungin league-ah goal 10 a khung tho.

Player thar Sandro Tonali man a to a, Italian midfielder hian a man a phu thung. Midfield-ah Tonali hi Bruno Guimaraes leh Joelinton te nen an awm a, an nghet ṭha hle.

Newcastle tlarhnungah Sven Botman (6ft 4in) leh Fabian Schar (6ft 1in) te an ding. Botman hi Erling Haaland nen an intiat a, Dutch defender leh Danish striker hi veng tur hi a hmuhnawm dawn.

City hi mahni muala khel tur leh team ṭha zawk ni mah se Kevin de Bruyne hliam vangin an ṭhat dan berin an khel thei dawn lo. Chutihrualin Pep Guardiola hian KDB thlakna tur pawh player ṭha tak a nei a, Belgian midfielder an tluk lo deuh tih zawng a ni.

UEFA Super Cup-ah Croatian defender Josko Gvardiol-a'n City tan bul a ṭan a, Newcastle United an hmachhawn hunah engtin nge Pep-a'n a rem dawn tih hriatthiam a har. Season liam taa player pawimawh Ruben Dias leh John Stones pawh Super Cup-ah hian an inlan lo a, tlarhnungah duh thala player siksawina tur an nei.

KDB awm lo mah se a nihna takah chuan player chhawr tur an ngah. Manto taka an lakluh Kalvin Phillips an chhawr meuh lo a; rawlthar duhawm Cole Palmer ten khelhna chance an nei thung.

Pep-a'n tun season atana an ṭhat dan ber tur a la hre lo a, chutichung chuan team ṭha bera chhal chu an la ni lawi si. Etihad Stadium-a City hmachhawn hi UCL khel tur Newcastle tan fiahna ṭha tak a ni ang.