Kaley Cuoco bialpain 'The Big Bang Theory' ah a chang tih a lo hre lo

TV show hit em em, 'The Big Bang Theory'-a Penny lema chang, Kaley Cuoco chu a bialpa, actor Tom Pelphrey chuan an in date tirh khan he show-ah hian a chang tih a hre lo tlat.

W Magazine-in tun hnaia an kawmnaah Pelphrey chuan hei hi a sawichhuak a, 'Kaley hi a hmain engah mah ka hmu ngai lo," a ti. An inkawp hnua New Jersey-a a ṭhiante leh chhungte bula a hruai ṭumin, show-a a hming 'Penny' tiin an lo ko a, a hrethiam lo hle tih a sawi. 'Kaley chu ka ko hrang a, pawi ka tih thu ka hrilh a. Engvangin nge Penny an tih ngawt che ka hrethiam bik lo," tiin ka hrilh a, ani hian 'The Big Bang Theory'-a a character hming tih a lo hrilh chuan mak a ti hle tih sawiin, a lo hriat ngai loh thu a sawi.

Cuoco leh Pelphrey hi an manager Andrea Pett-Joseph hmalaknain kum 2022, April thla khan an inhmu a, a inkawprem zui nghal hle. Fanu, thla li mi an nei tawh a, mahse an la innei lo.