Vanva area-a khaw 11-te chuan, Hnahthial district a taka tihpuitlin a nih pawhin, Hnahthial district-a awm an duh lo a, Lunglei district-a awm zui zel an duh thu an puang. Hemi chungchanga resolution an siamah khaw 11-a village council president ṭheuhin hming an 

ziak a ni.

Vanva area huam chhunga khaw 11 - Ramlaitui, Sekhum, Mualṭhuam North, Haulawng, Mausen, Chêngpui, Zotuitlang, Hmuntlang, Bualpui-V, Chhipphir leh Rálvâwng village council-te chuan nimin khan Haulawng V/C Office-ah joint meeting an nei a; Mizoram sorkarin district thar pathum a hawn turah district thar piang tur Hnahthial district-a awm an duh loh thu leh, Lunglei district-a awm zui zel an duh thu resolution siamin an tarlang a ni.

Joint meeting-ah hian, khaw 11-a V/C-te chuan an khua ṭheuhah mipui ko khawmin, Gram Sabha/ NGO leh political party leader-te an ko khawm a, Hnahthial district-a awm an duh loh vek thu an sawi.

An resolution-ah chuan, "Mizo-ram sorkarin district boundary sâwi danglam a, Lunglei district sât thlaa Hnahthial district boundary siam a nih pawhin, keini Vanva area V/C (Ramlaitui, Sekhum, Mualṭhuam 'N', Haulawng, Mausen, Chengpui, Zotuitlang, Hmuntlang, Bualpui-V, Chhipphir leh Ralvawng) Joint Committee chuan kan geographical location te, inkalpawhna te,  eizawnna te, mihring inlaichìnnate thlirin, Hnahthial district-a awm hi remin kan hre lo a, Lunglei district-a la awm zel hi kan duh. Hnahthial district-ah min rín lut lui a nih chuan a tàwp thlengin hma kan la zel ang," tiin an 

ziak a ni.

Share this Post