Chief minister Zoramthanga hoa Council of Ministers-te nimin zinga CMO Cabinet Room-a ṭhukhawm chuan, Mizoram ramri atan Bengal Eastern Frontier Regulations (BEFR) 1875 an pawm. Hetih lai hian MZP chuan, Vairengte dáia sipai cinema hall hlui, Assam Forest department-in tun hnaiah sa ṭhaa an luah chu July 12, 2019 ral hmaa chhuahtir turin Mizoram sorkar an phût.

Cabinet meeting chuan, 'Mizo mipuite'n ramri atana kan pawm tlân Bengal Eastern Frontier Regulations, 1875 chu ṭan chhan atana hman tur leh sorkar dinna a ni,' tiin thutlukna an siam a ni.

Meeting-ah hian, The Mizoram (Selection of Candidates for Higher Technical Courses) Rules, 2016  chungchang ngaihtuah a ni a; Rules hnuaia Mizoram quota - Category-I a dil theite 'Indigenous People' tiha inziak chu 'Zo Ethnic' bak Mizoramah 'Indigenous People' an awm loh avangin 'Zo Ethnic' pual atan an dah.

Cabinet meeting-in a rel dan chuan, July 2, 2019-a Durtlang Leitana Basic Service to Urban Poor (BSUP) hnuaia in sak chim chu chhui turin Aizawl DC kaihruai Magisterial Inquiry din a ni.

Council of Ministers thurel hrang hrang chu nimin vek khan minister pathum - Lalchhandama Ralte, Lalruatkima leh TJ Lalnuntluanga ten Deputy Speaker pisaah MZP hruaitute an hrilhfiah.

Hetih lai hian, ramri chungchangah MZP chuan, Bairabi Zophaia MZP-in Zofate Chawlhbuk an sak tawh Assam Police leh Forest department-in rei lo te chhunga an ṭhiah lai leh, a hnua sak leh an tum laia nasa taka vuak leh kah hial an tawh lai a, July 6, 2019-a Vairengte khaw daia sipai cinema hall hlui, Assam Forest-te'n sa ṭhaa office atan an luah nghal thei chu pawi an tih thu an tarlang.

MZP chuan, Assam Forest-in sipai cinema hall hlui thawm ṭhaa an luah nghal chu July 12, 2019 ral hmaa an chhuahsan theih nana hma la turin Mizoram sorkar an ngen a; Mizoram sorkarin a chhuahtir lo a nih chuan July 17, 2019 ral hmain Bairabi Zophaia Mizoram chief minister hmasa ber Ch. Chhunga (L) leiletah Zofate Chawlhbuk sa ve ngei turin Mizoram sorkar an phût.

Mizoram sorkar an phût anga thil tih a nih loh a, July 17, 2019 ral hmaa Mizoram sorkarin Zofate Chawlhbuk a sa thei lo a nih chuan, MZP chuan July 19, 2019-ah ''Ram chhan kawngzawh'' huaihawt an tum tih an puang a ni.

MZP chuan, Mizoram leh Assam ramri buai en zuia bawhzui tura a din Core Committee, Mizoram Chief Secretary kaihhruai chu meeting nei ve 

ṭhin mah se, tun thlenga an hmalakna leh ramri an vei dan chu a beitham hlea an hriat thu an sawi a, "Core Committee-in MZP-te ramri chungchanga document ṭul leh pawimawh la khawm tura a tih angin, April 16, 2019-a document kan thehluh tawh tun thlenga bawhzuina a awm lo chu hriatthiam har kan ti hle a ni," an ti.

Cabinet meeting-in The Mizoram (Selection of Candidate for Higher Technical Courses) Rules 2016 chungchanga thtlukna a siam dan chu lawmawm an tih thu MZP chuan an tarlang a, "Mizoram sorkar chunga thinlung takin lawm thu kan sawi a ni," an ti. Hnam dang, ram leilung fa ni loin Mizote chanvo chuh buai an tum leh a nih pawhin huaisen taka ding zel turin sorkar an 

ngen a ni.

Share this Post