Hmun hrang hrangah Independence Day lawm
Nimin khan Mizoram hmun hrang hrangah Independence Day vawi 77-na lawm a ni a, district khawpui tin bakah, zirna-in ṭhenkhat leh hmun dang eng emaw zatah lawm a ni.
LUNGLEI
Lungleiah chuan chawhma dar 10-ah Ṭhuamluaia Mualah Independence Day lawm a ni a, minister C Lalrinsanga'n hnam puanzar pawt pharhin, parade contingent 27-te'n hnam puanzar chibai an bûk a chháng lêt.
Lungleiah hian parade contigents 27 awmin, armed contigents pali, unarmed contigent pasarih, school contigent 13 leh band party pathum an ni a; armed contingent-ah Baptist HSS Air Wing leh school contingent-ah JNM School-te pakhatna an ni.
Parade-a ti ṭhate leh I-Day puala thil tih hrang hrangah lawmman sem a ni a, national leh state level-a Lunglei district aṭanga chawimawina dawngte hnenah lawmpuina leh chawimawina hlan a ni bawk.
I-Day pual hian nimin chawhnu lam khan DC banglaah 'At Home' buatsaih a ni a, sawm bikte'n thingpui an inho a ni.
SIAHA
I-Day vawi 77-na hi Siahaah chuan District Playground-ah lawm niin, minister Lalrinawma'n hnam puanzar a pawt pharh a, parade hoin hnam puanzar chibai an bûk a chháng lêt.
Siahaah hian parade contingent 18 awmin, uniform contingent panga leh school contingent 13 an ni a; parade-a ti ṭhate hnenah khuallianin lawmman a hlan a, Don Bosco School NCC leh Lorrain English School-te pakhatna an ni.
CHAMPHAI
Champhaiah chuan Chhangphut Field-ah I-Day lawm a ni a, minister of state TJ Lalnuntluanga'n hnam puanzar a pawt pharh. Parade contingent 30-in hnam puanzar chibai an bûk.
Parade-ah hian Champhai College 1st NCC leh BC Lalthlamuana English Academy Girls Contingent hnenah lawmman pakhatna hlan a ni a, I-Day puala infiamnaa intihsiakna lawmmante sem a ni bawk. I-Day lawm zawhah sawm bikte tan DC banglaah VIP’s At Home buatsaih a ni.
KOLASIB
Independence Day hi Kolasib Sports Stadium-ah pawh lawm a ni a, minister K Lalrinliana'n hnam puanzar pawt pharhin, parade contingent 19-in hnam puanzar chibai an bûk a chháng lêt. Minister hian LAD hnuaiah VC house 150 sak thar leh sak ṭhat 98 a awm thu a sawi.
Kolasib-ah hian parade-ah St. Johns Higher Secondary School leh Diakkawn High School Mizo Air Squadron NCC-te pakhatna an ni a, lawmman hlan an ni. I-Day lawmna inkhawm zawhah sawm bikte pualin DC Banglaah I-Day lawm zui leh a ni bawk.
SERCHHIP
Serchhipah chuan I-Day hi Sports Complex-ah lawm a ni a, minister Lalchhandama Ralte-in hnam puanzar pawt pharhin, parade contingent-te'n hnam puanzar chibai an bûk a chháng lêt. Parade contingent 14 an awm a, Serchhip College NCC Air Wing pakhatna an ni.
Lalchhandama Ralte chuan, Serchhip district-a khaw hrang hrangah vaimim metric ton 3,167 thar a nih thu a sawi a; kum 2022-23 chhunga zîkhlûm quintal 10,000 thar a ni a, cheng nuai 120 vel hû a tling thu a sawi bawk.
LAWNGTLAI
I-Day vawi 77-na hi Lawngtlaiah chuan Central YLA Playground-ah lawm a ni a, Legislative Assembly deputy speaker H Biakzaua khuallian a ni. Parade contingent 28-in hnam puanzar chibai an bûk a, parade-ah hian Don Bosco School NCC leh Lairam High School pakhatna an ni.
H Biakzaua chuan, SEDP hnuaiah pilot project leh family oriented aṭangin Lawngtlai district-ah chhungkaw 4,600 chuang hnenah sum pek a nih tawh thu leh chhungkaw 4,309 hnenah September 2023 ral hmain sum pek leh tum a nih thu a sawi.
I-Day pual hian Lawngtlaia damdawi-in pathum - Lawngtlai District Hospital, Christian Hospital leh Lairam Christian Medical Centre & Hospital te, home leh jail-ahte ṭanpuina Rs 2,000 ṭheuh hlan a ni.
MAMIT
Mamitah chuan GSA Playground-ah I-Day lawm a ni a, minister of state Robert Romawia Royte-in hnam puanzar pawt pharhin, parade contingent 15-te'n hnam puanzar chibai an bûk a chháng lêt. Parade-ah hian pakhatna Presbyterian English School Girls' an ni a, Mamit HSS Girls' Contingent leh JNV Girls' Contingent-te pahnihna leh pathumna an ni.
Robert Romawia hian Nasha Mukt Bharat Abhiyan (Drug Free India Campaign) chu Mamit district tan a hawng nghal a; I-Day lawm zawhah District Jail leh home pahnih a tlawh bawk.
SAITUAL
Saitualah chuan Keifang Centenary Sports Complex-ah I-Day lawm a ni a, minister R Lalzirliana'n hnam puanzar a pawt pharh a, parade contingent 16-in hnam puanzar chibai an bûk.
Parade-ah hian Keifang H/S pakhatna an ni a, Saitual M/S-1 leh Graceland Adventist School pahnihna leh pathumna an ni. Sports Complex-a I-Day lawmna inkhawm zawhah sawm bikte tan DC banglaah VIP’s At Home buatsaih a ni.
KHAWZAWL
Independence Day hi Khawzawlah chuan Mualvawm Field-ah lawm a ni a, deputy chief minister Tawnluia'n hnam puanzar a pawt pharh a, parade contingent 19-te'n chibai an bûk chháng lêt.
Parade-ah hian JNV chu pakhatna niin, Khawzawl HSS leh Far East Experimental School chu pahnihna leh pathumna an ni a, khuallianin lawmman a hlan. Khawzawl ṭihmingṭhatu zaithiam hnenah chawimawina hlan a ni bawk. Mualvawm Field-a I-Day lawmna inkhawm zawhah DC banglaah ‘VIP at home’ hun hman a ni.
Deputy Chief Minister chuan, Khawzawl police-te'n tun hnaiah heroin gram 1,830.11, Rs 91,509,500 hû leh zu litre 188 an man thu te, dan loa tawlh kuhva rah ip 1,995 (Rs 1,28,12,400 hû), leiṭha (fertilizer) dan loa phurh ip 3,524 (Rs 35,24,000 hû), dan loa tawlh záwng pali leh sava 13 an man thu a sawi bawk.
HNAHTHIAL
Hnahthialah chuan HDFA Turf Ground-ah I-Day lawm a ni a, minister Dr R Lalthangliana'n hnam puanzar pawt pharhin, parade contingent 10-in hnam puanzar chibai an bûk a chháng lêt.
Minister hian parade-a ti ṭhate I-Day puala essay inziahsiaka ti ṭhate hnenah lawmman a hlan a; kângmei vên lama hma la ṭha khuate hnenah lawmman a sem bawk.
HMUN DANG
Independence Day vawi 77-na hi Thenzawla Loṭhazawl Field-ah lawm a ni a, SDO (Civil) Rebecca Laldinmawii Hrahsel-in parade contingent 15-te'n hnam puanzar chibai an bûk a chháng lêt.
Gauhati High Court, Aizawl Bench-ah pawh I-Day lawm a ni a, High Court judge Justice Michael Zothankhuma'n hnam puanzar a pawt parh a, 225 CRPF-te'n hnam puanzar chibai an bûk. gauhati High Court judge dang Justice Marli Vankung leh hotu dang te, Mizoram State Legal Services Authority leh Aizawl District Court-a hotu te, Mizoram Bar Association hruaitute leh Ainawn Veng khawtlang hruaitute an tel a ni.
Aizawl Theological College pawhin zing dar 7-ah I-Day an lawm a, ATC principal Rev. Dr R Tlanghmingthanga'n kaihruaiin, khuallian Dr Vanlalthlana, MLA-in hnam puanzar a pawt pharh. ATC hi Rev. DE Jones hoin kum 1907-ah din a ni a, zirtirtu 31, thawktu dang 34 leh zirlai 203 an awm mek a ni.