Corruption donaa hmalak tur ṭul zual ni 100 chhunga tih hman kan tum - Duhoma

ZPM leader Lalduhoma chuan ZPM an sorkar chuan eirûkna leh hlemhlêtna (corruption) donaa hmalak tur ṭul zualte an sorkar aṭanga ni 100 chhunga tih hman an tum thu leh, an candidate turte chu ‘Ka eiru ve dawn lo’ tia thu tiam turin an chah thu a sawi.

Lalduhoma hian July 26, Nilaini khan East Tuipui biala Khuangléng, Sazêp, Vangchhia, Bungzung, Vanzau, Leithûm leh Dungtlang khuate tlawhin, vantlang inkhawmah thu a sawi a; "Corruption hi ni 100 chhungin hmalak ṭul zual tih hman kan tum. Kan candidate zawng zawng ‘Ka eiru ve dawn lo’ tia thu tiam turin kan chah. Thil dangah páwl dang kan phâk lo mai thei, eiru ve lo tura kan infuih nasat avangin an ti ngam lo turah kan ngai a, an lo ti a nih pawhin kan sîksâwi hreh dawn lo," a ti.

ZPM Leader chuan, "Kan sorkar veleha kan do tur hmasa ber chu corruption a ni. Corruption hian kan thinlung mai ni loin kan ram leilung leh nungcha a tichhe mek," a ti a; Mizoram sorkarin leibá a ngah avangin leiba rulh a hautak hle dawn thu a sawi.

ZPM a sorkar hunah Mizote thlai thar zawng zawng an lei sêng dawn loh thu sawiin Duhoma chuan, "Kan lei hmasak tur chu sawhthing, hmarcha, aieng, hmunphiahte a ni a, a rate pawh kan tarlang tawh. Kumpui lingleta rim taka hna kan thawh ṭhin a hlâwk theih nan ruahmanna kan siam," a ti.

ZPM Leader chuan, Mizoramah ram âwl hman ṭangkai loh a la tam tih sawiin, "Kan thlai thar lei tur hi short term a ni. Mumal takin contract farming leh vegetable supply chain kan ti dawn a, kan duh duh thlai chíng mai loin, a rate awm sa leh hre sain thlai chìn tur kan thlang dawn. Kum tina lo vât tawh loin eizawnna ngêlnghet kan neih theihna turin hma kan la dawn a ni," a ti.

ZPM a pian tirh aṭangin beih an tâwk nasa tih sawiin Duhoma chuan, "Tunah phei chuan beih rawn kan tâwk mek. ZPM atangin an báng nasa tih te, kei phei chu Arabian Sea-a hleuh kái tih mai mai hmangin min bei. Chutih laiin, ni tin mi thar duhawm tak tak kan nei a ni," a ti a; an sorkara hna hmasa tur zingah tar pension Rs 1,000-ah tihpun an telh thu a sawi bawk.

East Tuipui biala ZPM-in candidate tura an ruat Dr C Lalrammawia pawhin thu sawiin, "Kut hnathawktute kan harh tawhin a hriat a, anmahni khai chhuaktu tur hi beisei takin an thlir tawh niin a lang. Sorkar hnathawkte pawhin sorkar thar neih hlân an nghakhlel em em. SEDP board ang chi, sum tam tak a thlàwna luan ralna ang hi kan ti ve dawn lo a, MLA contractor kan nei ve dawn lo," a ti.