Mizoramah income tax return file zir chian mek 700 a awm

Directorate of Income Tax (Intelligence and Criminal Investigation), Guwahati chuan nimin khan Hotel Regency-ah 'e-Verification Scheme 2021 and Statement of Financial Transactions' zirhona an buatsaih. Mizoramah mimal/firm-in income tax return filr (sum lakluh dan report-na) zir chian mek 700 a awm thu tarlan a ni.

Zirhonaah hian mimal leh pawl sumdawngte leh chhiah kaihhnawih sorkar hotute an tel a; Income Tax (Intelligence and Criminal Investigation) director (Guwahati) N Jungio hoin Shillong-a Income Tax additional commissioner Rintei Renthlei, Guwahati Income Tax officer KB Nandi, Guwahati Income Tax inspector pahnih Gautam Das leh Vijay Nand Mishra te an tel.

e-Verification Scheme 2021 hi income tax chungchanga information inmil lote zir chian leh finfiahna tura duan a ni a; Income Tax director N Jungio-a'n e-Verification Scheme, 2021 leh a kaihhnawih thilte a sawifiah.

Zirhonaa tarlan danin, e-Verification Scheme hnuaiah assesment year 2021-22/ financial year 2020-21 chhungin hmarchhak state hrang hrangah income tax return file zir chian mek 3,000 vel a awm a, chu'ng zinga 700 chu Mizorama mi a ni.

Mizoram bika enfiah mek 700 zinga 600 chu mimalte a ni a, partnership firm 23-te leh local authority, government body, educational institution leh a dangte 77 a awm.

Mizorama income tax return file zir chian a nih chhante chu - pawisa dah luh zat (cash deposit), fixed deposit pun dan (interest from fixed deposit), saving bank interest, foreign visit, foreign exchange, lirthei leina leh business receipt vangte a nih thu tarlan a ni bawk.