MYC Super IAS 2023 programme-a full sponsorship hmu turin mi 11 an tling

Mizoram Youth Commission (MYC) chuan Super IAS 2023 Programme Screening Exam result a tichhuak a, exam hmachhawntu mi 365 zingah MYC Super IAS 2023 hnuaia full sponsorship hmu turin mi 11 an tling.

MYC chairman Dr Vanlalṭanpuia, MLA chuan MYC Super IAS 2023 Screening Test result chungchangah nimin khan a pisaah thuthar thehdarhtute a kâwm a, "Sponsorship hmu tur thlanna hi fair takin kan kalpui a, written exam mi 365 zinga mi 40 personal interview turin an tling a, interview hi Mizo zinga central service kan neih mek Pu Lalramsanga Sailo (IRS), Pi Rintei Renthlei (IRS) leh Pi Elvina Leivon (IAAS) bakah, Vision IAS mithiamte'n an conduct a ni," a ti.

Delhi-a IAS coaching kal tura thlan mi 11-te chu naktukah intiamkamna (bond agreement) an ziahpui dawn tih sawiin Vanlalṭanpuia chuan, "Super IAS 40 kan kalpui tawh dan angin UPSC Prelims vawi hnih an hmachhawn hma chuan central leh state hnuaia hna dang an dil leh exam phalsak an ni dawn lo," a ti a, a hma thei ang berin Delhi-ah an kaltir dawn thu a sawi.

MYC Chairman chuan, MYC full sponsorship-a Delhi-a IAS coaching kaltute chu an kal lam leh haw lam thlawhtheihna chuan man te, coaching an kalna senso te, Delhi-a an awm chhunga an mamawh turte an tumsak dawn tih a sawi a; chuta tan chuan budget-ah cheng nuai 50 an neih mek thu leh chu chuan a daih dawn lo a nih chuan Chief Minister hnenah an dil belh dawn thu a sawi bawk.