Minister Dr Thangtea'n Central hotute a kâwm

Minister Dr R Lalthangliana chuan nimin khan New Delhi-ah sorkar laipui hotute a kâwm a; Rajya Sabha MP K Vanlalvena nen Border Roads Organization (BRO) director general Rajeev Chaudhary an kâwm bawk.

Sorkar thuchhuah tarlan danin, Dr R Lalthangliana hian Ministry of Home Affairs hnuaia Department of Border Management secretary Atal Dulloo chu a pisaah a kâwm a; Kawrpuichhuah integrated check post (ICP) tihpuitlinna tur sum ruahman tawh vbc. 552 chu Central Cabinet pawmpui tura thehlut thuai turin a ngen. Atal Dullo chuan, uluk taka a zir tur thu leh a theih anga ranga bawhzui a tum thu a lo hrilh. Zokhawthar leh Zorinpuia land custom station atana DPR siam tur chu lo en zui a tum thu a sawi bawk.

R Lalthangliana leh Rajya Sabha MP K Vanlalvena chuan BRO director general Rajeev Chaudhary chu a pisaah an kâwm a; Lunglei leh Lawngtlai district inkalpawhna Tuipui-D Darzokai lei dawhna tur cheng vbc. 91 chuang pek tawh chungchangah Rajeev Chaudhary chuan, a ṭul angte an tihfel tawh thu leh thuneitu sangah an thlen mek thu sawi.

BRO-in Thingsai-Pangkhua defence road an laih mek chu hmabak km. 21.38 a la awm thu R Lalthangliana chuan a sawi a; BRO DG chuan, NH single lane angin an chhunzawm turin Ministry of Defence-in cheng vbc. 111 a ruahman tawh thu te, thla ruk chhungin DPR peih tum a nih thu leh working season tharah hna ṭan hman tum a nih thute a lo hrilh.