Zirna ngaihthahah Mizoram sorkar puh

ZPM Ṭhalai Headquarters chuan, Mizoram Law College sak mekah hmanrua an hman leh sak dan a lungawithlak loh hle tih tarlangin, Mizoram sorkar chu zirna ngaihthahah leh sum siamna atana zirna hmangah an puh.

ZPM Ṭhalai hruaitute hian nimin khan Aizawl Press Club-ah thuthar thehdarhtute an kâwm a; an vice president Zoramchhana Sailo chuan, July 10, Thawhṭanni khan Mizoram Law College sak mek a hmunah an endik a, February 28, 2023 khan an lo en tawh bawk thu tarlangin, "An hmanraw hman leh a sak dan a lungawithlak loh hle a, tun thlengin mipui leh zirlai tana lawmna tur thil danglam hmuh tur a la awm lo," a ti.

Mizoram Law College sak mek chu nimin khan ZPM ṭhalaite'n tlawhin, Mizorama law college awm chhun ngaihthah a nih avanga pawi an tihna leh an duh lohzia an lantir a ni.

Zoramchhana Sailo chuan, Mizoram Law College-ah college danga an hman duh tawh loh bus hlui tak pakhat chiah a awm tih sawiin, "Zirlaite'n harsatna tam tak an tâwk ṭhin. College sak mek hi May 4, 2020 aṭanga thla 20 chhunga sak zawh tur a nih laiin, tun thlenga a hna chanve pawh zawh a la ni lo te, a satu hnenah cheng nuai 117.96 pek a ni tawh si te, engineer-in a vil mumal lote hi thil fel lo tak a ni. Kan tlawh hmasak ṭumah pawh cement thi tawh hman a nih thu kan dawng," a ti.

Mizoram Law College satu chu Sky Ridge Construction & Consultancy Services a ni tih sawiin Zoramchhana chuan, "RUSA 2.0 'Infrastructure Grants to College' hnuaia hna 35 awmah hna 15 zet restricted tender hmangin an thawk a, thil rinhlelhawm tak inphûm ru a awm ngeiin kan ring. Sky Ridge Construction & Consultancy Services phênah hian a changtu minister Dr R Lalthangliana hian manṭang a ei ve em ni?" a ti. Dr R Lalthangliana chu a department chana hna chhe lutukte sawifiah turin an phût.