Hlim takin MHIP Day lawm a ni

Nimin July 6 kha Mizo Hmeichhe Insuihkhawm Pawl din champha, MHIP Day a ni a, Mizoram hmun hrang hrangah lawm a ni. MHIP Gen.Hqrs President chuan, ram leh hnam vei tura an fate zirtir tur leh, MLA inthlanpui awm turah insit loa pên chhuak turin Mizo hmeichhiate a chah.

MHIP Day-ah hian branch tam tak chuan inkhawmin an lawm a, infuihna leh intihhlimna hun an hmang. MHIP General Headquarters hruaitute'n hmun hrang hrangah an hmanpui a ni.

MHIP Gen.Hqrs president Ngurmawii Sailo chuan MHIP member zawng zawngte chibai bûkin, ram leh hnam hmasawnna tur leh a chhe laite siamṭha tura nasa lehzuala ṭan la ṭheuh turin a sáwm. Ṭhalai zingah ram leh hnam hmangaih nacháng hre lo tam tak an awm tawh tih sawiin, "Ram leh hnam vei turin kan fate kan zirtir a ṭul. Nute hian kan fate hi ram leh hnam hmangaihna rilru pu chunga engkim ti turin kan zirtir a ngai. An thinlungah ram hmangaihna chi kan tuh nghet thei a ni," a ti.

Khawvel hmasawnna ṭhang duang tak karah fate'n Pathian ṭihna tak tak an neih theih nan kaihhruai an ngai hle tih sawiin Ngurmawii chuan, "Ṭhalaite zingah pawnláwi taka sakhuana kalpui leh social media a ṭha lo zawnga hmanna a nasa a, a pawi a ni," a ti a; mahni in chhungkhurah fate zirtir a, rilru thar leh Pathian ṭihna nen chhungkuaa ṭan la thar turin nute a chah.

Ngurmawii Sailo chuan, Mizo hmeichhiate chu ram siamṭha tur leh kaihruai turin an ṭha tâwk tih sawiin, "Zoram tan thil ṭha tam tak kan ti ṭhin a, kan ti zel ang. MLA General Election lo awm turah pawh insit miah loin rawn pên chhuak teh u, kan ram tan hian Mizo hmei­chhiate hian lungrual takin ṭan i han la tlang zel ang u," a ti.

MHIP President chuan, hmeichhiaten kil hrang hranga hma an sawn viau laiin, mipate an hnung tawlh loh nan nute'n mawhphurhna an nei tih sawiin, "Sual laka ven nan kan fapate in chhungah awm àwltir mai mai loa kan chhawr hriam a, ram leh hnam tan an hlutzia kan hrilh fo a ṭul," a ti a; hnam dang nupui/pasal nei lo tura fate zirtir leh kaihhruai a ṭul thu a sawi.

MHIP thil tum 'Mite ṭanpui' tih a nih angin, hmeithai leh fahrah te, chanhaite chhawmdâwl kawngah ṭan la zel turin MHIP-te a chah a; MHIP branch-te'n Myanmar, Bangladesh leh Manipur aṭanga ráltlânte an ṭanpui ṭhin chu lawm­awm a tih thu sawiin, "Samari mi ṭha thinlung púin kan awmhmun ṭheuhah ṭanpui ngaite tan i che chhuak zel ang u," a ti. Dikna leh rinawmna vawng nung zel turin MHIP member-te a chah bawk.

MHIP-ah hian member 2,80,000 vel an awm mek a; sub-headquarters 10, block 26, joint 19 leh branch 758 an nei mek a ni.