Assembly Secretariat hna lak buaina : Assembly-in sût leh chi-ah an ngai lo; Zirlaite'n punkhawm an huaihawt dawn

Mizoram Legislative Assembly Secretariat-a thawk tur lak danah chhung­khat lainá induhsakna a awma an hriat vanga sût tura an ngennain awmzia a neih loh avangin MZP leh MSU chuan July 7, Zirtawpniah Assembly House kawtah punkhawm huaihawt an tum.

Hetih lai hian, Assembly Secretariat chuan tun hnaia assistant, translator, UDC leh LDC an lak thar chungchang chu thuchhuah siamin an sawifiah a; hna lakna tihfel tawh chu sût leh chi-ah an ngai lo tih an tarlang.

Mizo Zirlai Pawl leh Mizo Students Union chuan thuchhuah inṭawm siamin, "Mizoram Legislative Assembly Secretariat hna lakah chhungkhat lainá induhsak bikna a awm avanga cancel tura ngennain awmzia a neih loh chuan July 7, Zirtawpni zing dar 8:30 hian Assembly House kawtah punkhawm kan rêl," an ti.

Zirlai pawlte chuan, punkhawmah hian Mizo zirlai zawng zawng leh Mizo ṭhalai hna zawng mekte kokim taka tel turin an sáwm a ni.

Mizoram sorkar (Assembly Secretariat) chuan thuchhuah siamin, hna lakna tihfel tawh chu sût leh chi-ah an ngai lo a, 'The Mizoram Legislative Assembly Secretariat (Recruitment and Conditions of Service) Rules, 1995 as amended' dan ang thlapin hna an lak thu an tarlang.

Hna lak chungchangah pawl ṭhenkhatin hma an la chu thil ṭha duhna a nih avangin lawmawm an tih thu tarlangin Assembly Secretariat chuan, "An duh dan anga appointment hi cancel leh a nih chuan dan ang thlapa lak an nih avangin court-ah kal se, Secretariat lam hian kan hneh dawn lo. Hei vang hian cancel leh chi-ah kan ngai lo," an ti.

Assembly Secretariat chuan, inren-chemna avangin LDC bik a tirah panga lak tura advertisement chhuah ni mah se, sum a ziaawm leh hnuah pariat lak tura thutlukna siam leh a nih thu leh, advertisement chhuah leh a nih thu an tarlang a, "Budget session lai a nih avangin advertisement chhuah leh hi a tlai hret," an ti a, chuti chungin diltu mi 2,369 an awm thu an sawi.

Mizoram Legislative Assembly Secretariat chu Constitution Article 187 hnuaiah Secre-tarial staff hrang nei tura tih leh Recruitment Rules leh service condition pawh ṭha a tih anga kalpui ṭhin a nih thu te, exam-a mark leh mahni answer paper-te a duh tan RTI Act tlawhchhana dil theih reng a nih thute an tarlang bawk.

ASSEMBLY SECRETARIAT TARLAN

▶ Hna lakna atan Mizo Aw leh Dingdi chanchinbuahte January 25 & 26, 2023-ah advertisement chhuah a ni.

▶ LDC bik post zat tihpun a nih avangin corrigendum siam a ni a, February 22, 2023-ah Mizo Aw leh Dingdi chanchinbuahte advertisement chhuah leh a ni.

▶ Translator diltu mi 827 awmin, mi 159 an exam tluan.

▶ Assistant diltu mi 2,540 awmin, mi 453 an exam tluan.

▶ UDC diltu mi 1,610 awmin, mi 310 an exam tluan.

▶ LDC diltu mi 3,055 awmin, mi 712 an exam tluan.