Sangauah sikul leh pisa kái tur dang

Blue Mountain High School, Sangaua headmaster sawnna thupek sût leh zirtirtu dah belh phût vangin Lai Students' Association (LSA) Sub-Headquarters, Sangau chuan nimin aṭang khan Sangau khuaa zirna-in leh sorkar pisa zawng zawng an khâr.

Tarlan tawh angin, Blue Mountain H/S, Sangaua zirtirtu chungchanga harsatna an tawh kaihhnawihah hian kar kal ta chhung khan Blue Mountain H/S-a zirtirtu sikul kai turte dan an lo ni tawh a; sorkar aṭanga thu lawmawm an dawn loh avangin nimin aṭang khan Sangaua zirna-in leh sorkar pisa zawng zawng kal thei loin an dang a ni. Vawiin hian sikul leh pisate dan chhunzawm an tum bakah, kawngzawh an tum bawk.

Thu dawn danin, nimina zirna-in leh pisa an dannaah hian Sangaua sorkar pisa paruka pisa kái turte leh zirna-in 13-a zirtirtute dan an ni. Pisa an dan zingah hian Mizoram Rural Bank, BDO Office leh LADC office-te a tel a; pisa kai turte dang turin Sangaua LSA branch pali aṭangin zirlai 370 vel an thawk chhuak a ni.