Khawzawl DRDO pisa hawng

Deputy chief minister Tawnluia chuan nimin khan a biala Khawzawl Dintharah District Rural Development Officer (DRDO) pisa a hawng a; Khawzawl District Fisheries Development Office buatsaih sangha khawitute puala RKVY RAFTAAR 2020-2021 inzirtirna a hmanpui bawk.

DRDO pisa a hawnnaah Tawnluia chuan, "Khawzawl district-a kut hnathawktute thawhrimna malsawmin a awm a, a theih ang angin an tharte sawngbawlna tur khawl ruahman a ni. Chhungkaw tam takin eizawnna mumal tak an nei thei ta a, awmze neia hmalak chhunzawm zel kan tum," a ti a; thei leh thlai bakah, sanghaah ṭan lak thar tum a nih thu a sawi.

Khawzawl DRDO pisa hi MGNREGS leh MLA LADS sum nuai 166.91 sénga sak a ni a, implementing agency chu DRDO, Khawzawl district a ni. Hawnnaah hian Rural Development minister Lalruatkima pawhin thu a sawi.

Deputy CM chuan sangha khawitute puala zirtirna hun buatsaihah thu sawiin, sorkarin min pui ang a, hna kan thawk ang, tih rilru pu loin, kan thawk anga sorkarin min pui ang tih rilru pu zawk turin a chah a, "Pu Zoramthanga kaihhruai sorkarin Khawzawl tan hna a thawk nasa a, Covid-19 in nasa takin kan sorkar hi hnathawh kawngah tibahlah mah se, tunah chuan hma kan sawn zel a, hma kan la sawn zel dawn a ni," a ti.