Super IAS programme kalpui nan cheng nuai 190 vel sên a ni tawh

Mizoram Youth Commission (MYC) chairman Dr Vanlalṭanpuia, MLA chuan nimin khan a pisaah thuthar thehdarhtute a kâwm a; MYC-in Super IAS programme a kalpuinaah cheng nuai 190 vel an sên tawh thu a sawi.

MYC Chairman chuan, Super IAS 20 hnuaiah cheng nuai 40 leh Super IAS 40 hnuaiah cheng nuai 150 vel, a vaiin cheng nuai 190 vel hman a nih tawh thu a sawi a, Super IAS 40-te chu bond ziahtir vek an nih thu te, bond-in kum hnih chhung UPSC-ah chauh an exam a phal thute a sawi a ni.

Dr Vanlalṭanpuia chuan, MYC Super IAS 2023 atan July 20, 2023 khian Vision IAS, New Delhi-in Aizawlah entrance exam an buatsaih dawn tih sawiin, "Kumin Super IAS atan hian zirlai lak tur zat bithliah a awm lo. Kumin UPSC Prelims-a Mizo ṭhalai 13 tlingte aṭangin mi panga chu MYC chher an ni. Prelims-a tling zawng zawng hi Mains exam atan MYC-in an enkawl leh dawn," a ti a; Mains exam-ah hian Delhi aṭangin mi pathum leh Aizawl aṭangin mi 10-in an exam dawn thu a sawi.

ALS Coaching nen zirlai 100 tan mega hybrid (online & offline) course an kalpui thu sawiin MYC Chairman chuan, "MYC leh Charcos Global thawhhona hnuaia United Kingdom-a registered nurse hna thawk turin MOCH hnuaia coaching class kal aṭangin mi 10 leh hmun dang aṭanga Occupational Englisg Test (OET) exam aṭangin mi pahnihte'n sap ramah hna an hmu tawh," a ti a; MYC sponsor hnuaiah IELTS exam aṭangin UK-ah registered nurse hna thawk mi pasarih an awm tawh thu a sawi bawk.