LSC chungchangah fimkhur turin Mizoram Police-in mipui ngen

Mizoram Police chuan thuchhuah siamin, ram hman hawh chungchang inbumna a hluar chho tih an tarlang a, fimkhur turin mipui an ngen.

Police thuchhuah chuan, khawvel changkang zelah Mizoramah mi bum tum an pung ve zel tih a tarlang a, "A bikin ram lei leh hralh chungchangah te, mi ram hman hawh chungchangahte inbumna a lo hluar chhoh zel avangin mipuite kan fimkhur a ngai tak zet a ni," a ti.

Mizoram Police tarlan danin, in hmun lo rama inbumnaa hluar deuhte chu - LSC lem, a ram hmuh tur awm si lo hralh tumna te, LSC duplicate hmanga ram zawrh leh hralh tumna te, a neitu anga inchhála lemchan te, document lem hmanga ram hralh tumnate leh LSC neitute remtihna leh hriatpuina loa LSC dahkhamte a ni.

POLICE-IN MIPUI AN CHAHTE

▶ LSC document ngun taka endik hmasak tur a ni. LSC lem a ni em, ram a awm tak tak em, Land Revenue & Settlement department-ah a in register em, tihte finfiah hmasa tur.

▶ Ram chu a hmunah enfiah ngei tur a ni.

▶ Ram ṭhenawma ram neitute leh local council-te hnenah LSC a dik em, ram buai a ni em, ram inpek thuah a ni em, tihte leh LSC awmna dik tak hriat hmasak tur.

▶ Finfiah hmasa loin pawisa inpek lâwk miah loh tur a ni.

▶ Chhungte leh ṭhian ṭha pawh ni se LSC hawhtir suh.