Aizawl Smart City project hnuaiah hmun 76-ah CCTV bun thar a ni

Aizawl Smart City project hnuaiah Aizawl khawpuiah project 33 kalpui mek a ni a, project kalpui leh tur pariat a la awm. Aizawla hmun 76-ah closed-circuit television (CCTV) camera bun thar a ni a, chu'ngte chu hnu chhuina leh thil dang dangah a ṭangkai hle dawn niin an sawi.

Smart City project kum riat tlin pualin Aizawl Smart City chuan nimin khan an hmalakna ṭhenkhat thuthar theh­darhtute an fanpui a; Aizawl Smart City chief executive officer (CEO) CC Lalchhuangkima chuan, Aizawl Smart City atan cheng vbc. 500 ruahman a nih thu sawiin, "Project zawh tawh leh thawh mek 33 a awm a, hmabak pariat a la awm a, a vaiin project 41 a ni," a ti a; project 41 aṭangin 80% vel an thawh ṭan tawh thu a sawi.

Smart City hnuaiah hian Integrated Com­mand and Control Centre (ICCC) kalpui a ni dawn a, peih a ni ṭep tawh a, July 3, 2023 khian hawn tum a ni.

ICCC hmang hian Aizawla hmun 76-ah thlalakna - CCTV camera 237 bun a ni a, camera inher kual thei PTZ (pan, tilt, zoom) camera 40 bun a ni. Mihring hmai bik chiang taka la thei facial recognition camera panga, motor registration number plate recognition camera 14, environmental censor pali bun a ni.

AMC-in bawlhhlawh paihna atana an hman lirthei zawng zawngah GPS chi khat, solid waste management application vuah a ni a; chumi hmang chuan bawlhhlawh paih lirtheite'n bawlhhlawh sâwngbàwlna hmun an thlen leh thlen loh te, hmun danga bawlhhlawh an paih leh paih lohte hriat theih vek a ni dawn tih an sawi.

ICCC buaipuitute chuan, ICCC atan hian Aizawlah optical fiber cable a thlung chhuak vek dawn tih an sawi a; Aizawla vantlang hmun 15-ah free wifi an dah tih an sawi bawk.

CC Lalchhuangkima chuan, Smart City project chu kum 2018 khan Aizawlah kalpui ṭan a nih thu sawiin, "Kum 5 chhung project a ni a, kum 2023 June thlaa tàwp tur a ni. Mahse, kum khat atan min pawhseisak a, June 2024 thleng a ni ang," a ti.

Thuthar thehdarhtute hi Aizawl Smart City official-te chuan an hmalakna ṭhenkhat - Khatlaa Smart Street, Thingpui-huan Tlanga Multipurpose Ground, Durtlang khelmuala phûllem phahna tura chei ṭhat mek leh Zuangtuia indoor stadium sak mekte an tlawhpui a ni.