NGO Coordination Committee (Joint NGO) chuan, Tripura transit camp-a Mizoram mi Bru-te chu vote an neihna khua/polling station ṭheuhah vote thlaktir tur leh Kanhmunah an tan bika special polling station siam tawh lo turin thuneitute an phût.

Nimina Central YMA office-a Joint NGO hruai­tute ṭhukhawm chuan, "Lok Sabha thlanna neih turah, vawi tam tak Mizorama lo let tura ruahmannate leh anmahni pawhin an pawm ngei Agreement pawh zâwm duh leh lo, Mizorama let duh loa Tripura transit camp-a ṭan khawh lui tlat Tuikukte hi vote thlaktir an nih dawn chuan, Mizorama Electral Roll-a an chuanna polling station ṭheuhah vote thlaktir an nih theih nan ruahmanna siam turin thuneitute kan ngen," an ti a; special polling station siamsak tawh loh chu an duh dan a nih thu an tarlang.

Joint NGO chuan, "Tui­kuk, Tripura transit camp-a awmte hi Mizoram chhunga Electoral Roll-a an chuanna polling station ṭheuhah vote thlaktir tura ruahmanna siam a nih loh chuan, MP election hi Mizoramah neih a nih loh nan NGO Coordination Committee chuan hma a la dawn a ni," an ti.

NGO Coordination Committee chuan, Assam Rifles-te Lammual leh a chhehvel aṭanga Zokhaw­sanga sawn chhuahna tur order siam a ni chu lawm­awm an tih thu an tarlang a; chutih rualin, "Mi eng emaw zatin Lammual leh a chhehvelah LSC pass an lo nei tih hriat a ni a, sipaite'n an luah reng laia fel lo taka LSC siam rutute leh mawhphurtute chungah na taka hremna pek ngei a nih theih nan a rang thei ang bera hma la turin sorkar kan ngenin kan beisei," an ti a; LSC neite pawh a rang thei ang bera sorkara pe let turin an beisei tih an tarlang a ni.

Share this Post