Mizorama lui tui nut dan dinhmun; Lui tui nut chhan ber - leivûng paih

Fûr ruahsûr vangin Mizo­rama lui hrang hrangte tun hnaiah a nu deuh vek a, khawpui hrang hranga mipuiin an tlan lui ṭhenkhat phei chu pump tlâk loh leh tihthianghlim theih loh khawpa núte a ni. Tui nut chhan ber chu leivûng paih vang a ni. Hetih lai hian, June 20, 2023-ah chuan lui ṭhenkhat chu tui nu lutuk a ziaawm leh tawh thung.

PHE department supe­rin­tending engineer Ngen­tluanga'n Vanglaini palai zawhna chhanga a sawi danin, tui lakna luite a nut lutuk avangin Mizorama district khawpui tam zawkin harsatna an tâwk a, chutih rualin, khaw tam tak chuan tui lâkna lui dang (secondary source) an neih avangin harsatna lian lutuk an tâwk lo.

Mizoram khawpui ber Aizawl khawpui châwmtu Tlawng lui tui chu June 16 khan a nut lam Nephelometric Turbidity Unit (NTU) 977 a kai a, June 20 chawhma lamah erawh chuan NTU 120-ah a tla thla tawh a, hei vang hian tui thlitfimah harsatna a awm tawh rih lo. June 20 aṭang vek hian lei hîpna thâ hmangin Serlui tui lak ṭan a ni bawk. Hetih lai hian, power supply mumal loh cháng a awm avangin harsatna an tawk zauh zauh tih PHE department hotute chuan an sawi.

PHE department-in an chhinchhiah danin, mipui ei/in atana tui pump chhuahna hmuna tui nutna ber chu Saitual tui lakna Tuivawl lui a ni a, June 20 khan NTU 1,200 vel a ni a, June 19-ah 866 niin, June 16-ah phei chuan NTU 1,469 a tling. Tuivawl lui hi kumin May thla laihâwl vel aṭang khan pump tlak loh leh thlitfim tlak loh khawpa nú a la ni ta reng a; mahse, lei hîpna hmangin Bahra lui tui an la a, ni khatah darkar 4 vel tui an pump thei a ni.

PHE hotute tarlan danin, Mizorama lui tam zawka tui nut chhan chu kawng laihna leivûng paih vang a ni a; chu'ng zinga ṭhenkhat chu NHIDCL-in kawng an laihna leivûng an paih duhdah vang a ni.

TUI LAKNA LUI DINHMUN - JUNE 20, 2023
(PHE department chhinchhiah dan)

AIZAWL: Tui lâkna Tlawng tui nut zawng June 16-ah NTU 977 a kai a, June 20 chawhma lamah chuan NTU 120-ah a tla thla tawh a, tui thlitfimah harsatna a awm tawh rih lo. June 20 aṭangin gravity hmangin Serlui tui lak ṭan a ni.

LUNGLEI: Tui lakna pui ber Tlawng lui tui June 20-a a nut zawng NTU 410 a ni a, June 16-ah phei chuan NTU 1,700 a kai. Tui nut chhan chu lui hnár lama leivûng paih nasat vang a ni. Tui lâkna dang (secondary source) Pialthleng tui nut zawng June 20 khan NTU 90.20 a ni a, Pialthleng lui hian nasa takin pui mah se, a nut ve ṭhin tho avangin (June 16-ah NTU 304) mipui khamkhawp tui thlitfim a harsa.

SIAHA: Tui lakna Tuitlawk lui chu June 20-ah chuan NTU 76 chauh a ni a, ruah a sûr tam viau loh chuan tui pump a kal tluang. Chutih laiin, June 16-ah chuan tui nut zawng NTU 854 a tling a, tui a nut nasat lai chuan an pump thei lo. Tui nut chhan chu kawng síra leivûng paihte luia a luh vang a ni. Hetih lai hian, lei hîpna hmanga tui lakna dang an nei a, chu chuan a pui hle.

CHAMPHAI: Tui lakna Khawchhak Tuipui chu June 14 aṭangin pump tlak lohin a la nu char char a, June 20-a a nut lam chu NTU 500 aia sang a ni. Tui nut chhan chu ruahsur tam lutuka tuihâwk insiam vang a ni ber a, kawng laih leivung paih a awm hriat a ni lo. Fallui tui gravity hmangin a fîm laiin an la ṭhin a, ni khatah darkar 7-8 vel tui an pump thei. Dan pangngaiah chuan ni tin darkar 18-19 an pump ṭhin.

KOLASIB: Tui lakna Tuichhuahen chu lui dang anga nu lutuk a ni ngai lo a, June 20-a a nut zawng chu NTU 68 niin, tui pump-ah harsatna a awm rih lo. June 16-ah khan tui nut lam NTU 327 a kai thung.

SERCHHIP: Tui lakna Tuikum lui chu June 16-ah NTU 400 leh June 17-ah NTU 752-te kai mah se, June 20-ah chuan NTU 24 chauh a ni a, a fîm ṭha pangngai. Ruah a sûr erawh chuan tui a nu ṭhin a, a nut chhan ber chu NHIDCL-in NH kawng an laihnaah Serchhip Kikawnah spoil bank lian tak an siam a, a mawng lamah retaining wall an siam si loh avangin ruahsur leh tuihâwkin leivungte luia a len thlak ṭhin vang a ni. Spoil bank thlang lawkah tui pump-na Tuikum weir a awm.

LAWNGTLAI: Tui lâkna Chhimtuipui lui chu nasa takin a nu ṭhin a, tui pump a khaihlak nasa hle ṭhin. Tui nut lam June 16 khan NTU 1,050 a kai a, June 20-ah erawh chuan 290-ah a tla thla. Lawngtlai châwmtu dang Chengpawl lui pawh a nu hle a, June 16-ah NTU 988 a tling a, June 20-ah chuan 109-ah a tla thla. Gravity hmanga Nghafuan lui an lak ṭhin avangin chu chuan mipui harsatna a chhan a, tui pump khaihlak nasa lutuk tur a veng; Nghafuan lui hi NTU 105 chauh a ni. Hun pangngaiah ni tin darkar 11-12 tui an pump ṭhin a, tui a nut chuan darkar 6-10 vel an pump ṭhin.

MAMIT: Tui lakna Tut a nu viau a, a nut zawng June 20-ah NTU 650, June 19-ah NTU 158 leh June 16-ah NTU 504 a ni. Hmun pahnih dang - Kurung lui leh Lahmun aṭangin lei hìpna thâ hmangin tui an la thei a, chungte chu a nu vak lo a, NTU 60 hnuai lam niin, ṭangkai takin an hmang mek a, tui lakah harsatna an nei rih lo. Power mumal lo vangin harsatna an tâwk thung a, June 20 zing aṭangin tui pump a pangngai leh ṭan.

SAITUAL: Tui lâkna Tuivawl a nu hle a, May thla laihâwl vel aṭangin pump tlak lohin tui a nu tawh. Tui nut zawng June 20-ah NTU 1,200 vel a ni a, June 19-ah 866 leh June 16-ah 1,469 a ni. Tui nut chhan ber chu NHIDCL-in NH-06 kawng an laihna leivûng an paih vang a ni. Hetih lai hian, gravity hmangin Bahra lui tui an la a, ni khatah darkar 4 vel tui an pump thei hrâm hrâm. Hun pangngaiah chuan darkar 17 vel an pump ṭhin.

KHAWZAWL: Tui lakna Tuichang chu June 20-ah NTU 52.5 a ni a, a nu lutuk tawh lo. A hma lawkin nasa takin a nu a, June 16-ah chuan NTU 1,681 a kai bakah, a uih tel a, tui pump a khaihlak nasa. Tui nut chhan ber chu NHIDCL-in NH-06 kawngpui laihna leivûng an paih vang a ni. Gravity hmanga tui lâkin harsatna lian thleng tur a veng a, kawlphetha a awm ṭhat chuan ni khatah darkar 14-15 an pump thei.

HNAHTHIAL: Tui lakna Tuichang tui nut zawng June 16-ah NTU 883 a ni a, June 20-ah chuan a tlahniam hret tawh. Tui nut chhan ber chu kawng laihna leivûng paih vang a ni. Tui harsa lutuk tur Pu Dawna tui (secondary source)-in a chhan nasa hle.

TLABUNG: Tui lakna Khawthlangtuipui nut zawng NTU 300 chung lam a ni ṭhin a, tui a pump hleih theih loh.

BIATE: Tui lakna Tuipui tui a nu nasa lo a, harsatna a awm lo.