Mizorama jail-ah táng thei tur bituk aia tam mi 602 an táng mek

Mizoramah jail 10 a awm a, chu'nga táng awm thei zat tura bituk chu mi 1,386 an ni. June 18, 2023 (Pathianni) khan jail-ah táng 1,988 an awm thung a, tang awm thei zat tura bituk aiin mi 602-in an tam zawk.

Mizorama jail hrang hranga táng 1,988 zinga 1,657 chu mipa an ni a, mi 331 chu hmeichhia an ni. Táng awm tamna ber Central Jail-ah chuan mi 925 an táng a, táng awm thei zat tur bituk chu 438 niin, tang awm thei zat aia 487-a tam (a let aia tam) an táng mek.

Lawngtlai District Jail chu mi 98 tàn theihna tura ruahman niin, táng awm thei zat tlemna ber a ni a; táng mi 23 an awm mek a, awm thei zat aia tlem fe an táng mek a ni.

Aizawla jail pathum - Central Jail, Womens Jail leh District Jail-ah te, Lunglei District Jail leh Champhai District Jail-ahte táng awm thei zat bituk aia tam daih an táng mek a; jail dang zawngah chuan táng awm thei zat aia tlem an táng mek thung.

Mizorama jail 10-a táng mek mi 1,988 zingah thubuai la chinfel loh (ngaihtuah mek) 1,427 awmin, mipa 1,123 leh hmeichhia 304 an ni a, thiam loh chantir (convict) tawh mi 561 an awm.

Jail 10-a táng mek zinga mi 50 - mipa 49 leh hmeichhia pakhat chu dam chhunga táng tura an chungthu rèl tawh an ni a; mi 274 (mipa 258 leh hmeichhia 16)-te chu hrehawm taka táng (rigorous imprisonment) tura hrem an ni. Simple imprisonment (pangngai taka táng tur) mi 237 (mipa 227 leh hmeichhia 10) an awm bawk.