Minister leh MLA-te'n YMA Day an hmanpui

Mizoram sorkara minister leh MLA eng emaw zatin nimin khan YMA Day an hmanpui.

Deputy chief minister Tawnluia chuan a bial chhunga Khawzawl Vengthar leh Khawhaiah a hmanpui a; Khawhai town hall-a a hmanpuinaah YMA chu khawtlang innghahna leh rinráwl ber a nih thu sawiin, "Hnam nun ze mawi chhawm nungtu leh sûlsutu a ni a, chhiat ṭhat nikhuaa tu mah en hrang loa hma an la ṭhin hi a ropui. He pawl zahawm tak thil tum tihlawhtling zel turin rinawmna, dikna, huaisenna leh tlawmngaihna kan chhawm nun zel a ngai a ni," a ti.

Minister Dr R Lalthangliana chuan a biala YMA, Hnahthial Bazar Branch golden jubilee leh YMA Day a hmanpui a, "Pathianin Mizote rilruah thil hlu tak a dah leh lâk hran theih loh chu tlawmngaihna a ni a, sawifiah chi pawh a ni lo a, nunpui chi, hmangaihna, duhsakna leh lainatna nun a ni," a ti. Hnahthialah AH&Vety office thar June 21, 2023-ah hawn a nih dawn thu leh PWD Road Division hawn thuai tum a nih thu a sawi bawk. R Lalthangliana hian golden jubilee lawmna atan Rs 2,00,000 leh dekchi lian a pe a ni.

Rabung khuain YMA Day leh an branch diamond jubilee an lawmna chu Art & Culture minister R Lalzirliana leh MLA Dr ZR Thiamsanga ten an hmanpui a; Minister hian Vanapa thlàn leh a nupui fanaute thlân, Rabung ram Zawlnghaka phun chu a hawng bawk. R Lalzirliana chuan, YMA takin Zo nun mawi chhawm nung zel turin YMA member-te a fuih a; airgun scope ṭha tak nen sava veh chìn ṭhin bànsan a ṭul thu a sawi bawk.

Minister Lalrinawma'n a bial chhunga Chhiahtlang Kawnveng Branch-in YMA Day an hmanna leh branch silver jubillee an lawm a hmanpui a; Pathianin hnam tinte tih dan phung leh hnam ziaráng a pe tih sawiin, "Hei hi kan zahpui tur a ni lo a, kan chawi lâr zawk tur a ni," a ti a, HIV/AIDS laka him nan mipat hmeichhiatna hman khawlohah inthiar fihlîm turin YMA member-te a chah. Minister hian jubilee lawmpui nan leh YMA In an sak ṭanpui nan Rs 1,50,000 a pe a ni.

YMA, Saipum Branch-in kum 75 an tlin champha, platinum jubilee lawmna hriatrengna atana lungphun an siam chu nimin khan bialtu MLA Lalrinsanga Ralte-in a hawng a, Saipum khelmualah YMA Day a hmanpui. Lalrinsanga Ralte chuan, Saipum YMA platinum jubilee hriatrengna atan Saipum khuaa hmeithai pakhat, in nei lo chu in a saksak tur thu a puang.

MLA C Lalmuanpuia'n a biala YMA, Chanmari West Branch-in YMA Day puala faina hnatlang an buatsaih a hmanpui a; hnatlangah hian mi 567 thawk chhuakin, MLA hian hnatlanga thawk chhuak ṭha ber Vanapa section hnenah Rs 2,000 a hlân.

Chanmari West YMA hian an venga hmeichhe hum sual daite enkawlna, State Social Welfare & Rehbilitation Centre for Women hnenah YMA Day pualin thilpek chi hrang hrang an pe a, YMA aiawhin bialtu corporator John Zosangliana'n a hlan a ni.

YMA, Phulpui Branch-in an hall-a YMA Day an hmannaah F Lalnunmawia chuan, "YMA hi pawl ropui leh zahawm, Mizoram chhung leh páwn thlenga Zo fate min phuar khawmtu a ni," a ti a, YMA member-te chu lusûn khawhar hnémtu, hmeithai, pachhia leh ṭanpui ngaite ṭanpuitu ni zel turin a chah. F Lalnunmawia hian Ṭhiak khuaah YM Day a hmanpui bawk.

CHANMARI WEST BRANCH YMA

DAWRPUI VENGTHAR BRANCH YMA

MISSION VENG BRANCH YMA

PHULPUI BRANCH YMA