YMA Day hlim taka hman a ni

Nimin kha YMA Day vawi 89-na a ni a, Mizoram chhung leh páwna YMA branch hrang hrangte'n hlim takin an lawm. YMA Day hi Central YMA hruai­tute leh minister/MLA-te'n hmun hrang hrangah an hmanpui.

YMA Day hi zing kar aṭangin zan thlengin lawm a ni a; branch tam takin khua/veng chhung tihfai hnatlang an nei a, intihhlimna hun hmang te, hnam làm hmanga intihsiak leh entir te, léngkhawm/khawhar hla hmanga intihsiak te, ṭanpui ngaite sum leh paia ṭanpui leh kawng danga ṭanpuite an awm a ni. Ruai ṭheha lawm branch eng emaw zat an awm bawk.

CYMA president R Lalngheta chuan Tuikhuahtlang Branch-ah YMA Day a hmanpui a; YMA member-te chu Mizo hnam a dinchhuahna atan lungrualna leh ṭanrualna a pawimawh tih hriaa theihtawp chhuah tura chahin, "YMA hi ṭanpui ngaite ṭanpuitu a nih angin, ṭanpui ngaite ṭanpui kawngah ke pên thar leh ila, pachhia, fahrah, hmeithai, mangangte tan nu leh pa a ni tawh ṭhin angin an tan malsawmna i ni zel ang u," a ti.

R Lalngheta chuan, Mizoram chu Zo fate inpui a nih thu sawiin, Myanmar, Bangladesh leh Manipur aṭanga sahimna zawnga Mizorama rawn lutte tuamhlàwm leh ṭanpui kawngah theihtawp chhuah turin Mizoram mipui a chah bawk.

CYMA general secretary Prof. Lalnuntluanga chuan Chawlh­hmun Branch-ah a hmanpui a; YMA chu Pathiana in nghat, pawl thianghlim, politics rawngkai lo, mi tin huapzo leh Zo nun ze mawi tlawmngaihna lungphûma neitu a nih thu a sawi.

Prof. Lalnuntluanga chuan, YMA chu sorkar chhiat ṭhata mawhphurtu a nih thu sawiin, "Sawisel mai loa thuràwn petu a ni. A ni chu ni, ni lo chu ni lo ti ṭhin, rintlak loh leh belhchian dâwl lo laka fihlim, belhchian dâwl a ni tur a ni," a ti a; ram leh hnam humhalh nan zirna, thiamna leh finna lamah nasa zawka ke pên a ṭul thu a sawi bawk.

YMA hi June 15, 1935 khan Mission Veng, Aizawlah Young Lushai Association (YLA) tiin din a ni a, office bearer hmasa berte chu - president Rev. Lewis Evans (Pu Niara), vice president Katie Hughs (Pi Zaii), secretary Pasena leh Pu Vankhuma leh, treasurer Rev. David Edwards (Zorama Pa)-te an ni.

YLA chu October 7, 1947-ah Young Mizo Association (YMA) tia thlâk a ni a, Indian Societies Registration Act (XXI of 1860) dan hmangin May 14, 1977 khan sorkarah ziah luh a ni.

Central YMA hruaitute hnen aṭanga thu dawn danin, YMA hian tun dinhmunah member 4,03,872 neiin, mipa 2,46,689 leh hmeichhia 1,57,183 an ni a; branch 820, group 50 leh sub-headquarters pariat a awm mek.

Mizoram mai bakah India rama state dang - Assam, Manipur, Meghalaya, Nagaland leh Tripura-ahte YMA branch a awm a, ram dang (Bangladesh)-ah branch pakhat Sajek Branch a awm bawk.