Khawnvartui rim nam sangha endik mek a ni; FDA-in hralh rih lo turin a zuartute a hriattir

Food & Drugs Administration (FDA) chuan thuchhuah siamin, phai aṭanga sangha (Rohu) lakluhah khawnvartui rim namte chu endik mek a nih thu leh sangha zuartute chu phai aṭanga Rohu an lakte mipui hnenah hralh rih lo turin a hriattir.

FDA chuan, sangha hmuh ang angte chu hralh loh tura hrèn (freezed) mek a nih thu a tarlang a, "Endik turin sample pawh lak zel a ni a, Health department Food Testing Laboratory-ah test-na changtlung zawk kan neih rih loh avangin sangha sample eng emaw zat chu Central Food Laboratory, Kolkata-ah thawn a ni," a ti.

Sangha zuartute pawh tuna sample thawnte result hriat a nih hma chuan hetiang sangha (Rohu) hi state pawn aṭanga la lut rih lo tura hriattirin FDA chuan, "FDA hmuh phak loha kawl an awm a nih pawhin, mipuite him zawk nan hralh chhuak lo tura ngen an ni. Khawnvartui rim a nam theih dan hi zau zawka chhui ngai a ni," an ti a, state pawna sangha lo kalna lam Food Safety hotute thlenga biak leh hriattir an nih thu a tarlang.

Khawnvartui rim nam sangha chu taksa tan a ṭha dawn lo tih hriat sa a nih avangin Rohu sangha hi lei loh leh ei insum rih a him ber thu FDA chuan a tarlang bawk.