Mizote kan chak loh fo ṭhinna chu sapṭawng hlauhna - Assembly Speaker

Khawruhlian Higher Secondary School chuan nimin khan an sikulah HSSLC Examination 2023-a an zirlai zawng zawng an pass vek lawmna leh zirlai pass-te chawimawina hun an hmang a, Assembly speaker Lalrinliana Sailo, bialtu MLA-in a hmanpui. Assembly Speaker chuan Mizote chak loh fo ṭhinna chu sapṭawng hlauhna a nih thu a sawi.

Lalrinliana Sailo chuan, zirlaite chu mi hlawhtling an nih a pawimawh rualin, mi hlawhtling leh hlu nih tel tum turin a fuih a, "Hei hi ram leh hnamin a mamawh a ni. Tunlai kan khawvelah social media hman thiam lohna hian Zoram hi min rûn mek a, aia upa zahnate ti boin, NGO pawl zahawm tak tak te, Kohhran hlutnate hi a ti nep fo em aw tih theih a ni ta fo mai. Social media chu finna leh thiamna zawnna atana hmang zawk a pawimawh," a ti.

Mizote chak loh fo ṭhinna chu sapṭawng hlauhna a nih thu sawiin Lalrinliana chuan, "Thiam tuma zirte leh hmang ṭhinte kan nuih fo mai hi kan chak lohna hnar a ni. Sapṭawng hlauhna hi paih bo a, huaisenna nena hmalam pan a ṭul hle. Mi hlawhtling ni tur chuan huaisen a ngai a, mi huaisente hlawhtlinna khawvel a ni tih hre reng ang che u," a ti a, zirlaite chu Pathian ṭih a, dik leh rinawmna nena hmalam pan turin a chah.

Khawruhlian Higher Secondary School hi kum 2010-ah din a ni a, tunah hian Lumpsum School niin, zirtirtu pasarih leh zirlai naupang 48 an awm mek a ni.