Ṭang Puihna hi sem policy a ni lo - TT Zothansanga

Mizoram Pradesh Congress Committee chuan nimin khan Congress Bhavan-ah political session an nei a, MPCC general secretary TT Zothansanga chuan, Ṭang Puihna chu sem policy a nih loh thu a sawi.

TT Zothansanga chuan, Congress manifesto 'Ṭang puihna' chu thiamthil leh theihna neite an tuina, theihna leh thiamna hmanga eizawnna ngelnghet neih tumte dinchhuahna tura an mamawhna zawna puihna tur a ni tih a sawi a, "Ṭang puihna Rs 2,00,000 emaw, a aia tam pawhin sorkarin kan pui dawn. Sem policy a ni lo, ṭang puihna a ni,” a ti.

TT Zothansanga chuan, "Ṭang puihna hmangin Mizoram mipui hi hnam taima leh rinawma siam kan tum a, kan ram mipui hi hnathawk hnam, hnam taima tiin min hre tawh ang," a ti bawk.

MPCC general secretary dang Joseph Lalhimpuia pawhin thu sawiin, zirna chu Mizo ram leh hnam dinchhuahna turah an ngai tih sawiin, "Human resource-ah ṭan kan ngai. Kum 1976 aṭangin MBSE kan nei a, tunah hian CBSE thlir chungin zirlaite pawhin UPSC hmachhawn tura hmathlir kan neih a ngai ta," a ti.