ZORO-in Zofa Inkhawmpui Lian an buatsaih

Zo Reunification Organisation (ZORO) chuan nimin khan Vanapa Hall-ah Zofa Inkhawmpui Lian an buatsaih a, minister Lalruatkima'n a hmanpui. Inkhawmpui thupui atan 'Insuihkhawm leh zai i rel ang u' tih hman a ni.

Lalruatkima chuan, Zofate chu inlungruala hrui khat vuana an awm tlat a ṭul thu a sawi a, "Pathianin Zofate hi hnam anga dinchhuah tir a, leilung hausakna a la thuhruk pawh a neitu tura a tih te hi a la phawrhchhuah tir ngei ang. Chumi tur erawh chuan Zofate hi inlungrual a, hrui khat vuanin, hnam dangte mit hmuhah pawh hnam inlungrual kan ni tih lantir a ngai," a ti.

Zofa Inkhawmpui Lian hi ZORO vice president Rohmingthanga Kawlni in a kaihruai a;ZORO president R Sangkawia'n an pawl thil tum leh hmalak tawh dante, an hnathawh mek leh hmachhawp hrang hrangte a sawi. Zo hnam chi peng hrang hrang aiawhte bakah, MUP, MHIP, MSU, MZP leh CYMA aiawhte pawhin thu an sawi a ni.