Mizoram chhunga ramngaw humhalh bik - forest reserved, reverine reserved forest, road­side reserved forest leh gov­ern­ment plan­tation hmunah revenue pass, VC pass leh pass dang nei mi 3,391 an awm.
RTI Act hmanga zawhna Environment, Forest & Climate Change department-in an chhan dan chuan, forest reserved huam chhunga ram nei (pass nei) zat an chhinchhiah 3,391 hi protection duty an neih aṭanga an hmuh chhuah theih chinte chauh an ni. Hetihrual hian, pass petu an nih loh avangin an chhinchhiah theih aia tam a awm an rin thu an ziak lang tel.
Forest Division ṭhenkhat chuan Land Revenue & Settle­ment (LRS) dept.-in ram an pek copy an pek tel ve ngai loh avangin pass nei engzat nge awm tih an hriat theih loh thu leh an la enfiah mek thu an tarlang thung.
Forest reserved huam chhunga pass nei hriat­theih chin 3,392 zingah hian revenue pass leh VC pass bakah, Aizawl DC-in a pek te, MIP leh NLUP pass te, eng pass nge an neih tih hriat chian theih lohte pawh a awm.
LRS dept.-in forest reserved chhunga pass a pekte hi kum 1980 hnulama pek a tam hle a, kum 1980 hma lama pek pawh tlem a awm. VC-in pass a pekte hian an pass rinchhan hian forest reserved huam chhungah hma an la a; dil, leilet leh huante an siam mek hlawm a ni.
Hetihlai hian LRS dept. chuan RTI Act hmanga zawhna chhangin, restricted area, reverine reserved, roadside reserved leh reserved forest area hnaih a nih loh chuan EFCC dept. aṭangin no objection certificate lak a ni lo tih an tarlang thung.