KHAWTHLIR

KTP-in thisen pe

KṬP, Kolasib Vengthar Branch chuan nimin khan an pastor quarters-ah thisen pek huaihawtin, Kolasib District Hospital tan thisen unit 27 an pe a, petute mipa 23 leh hmeichhia pali an ni.

Lawmpuina hlan

South Tuipui bialtu MLA Dr R Lalthangliana, minister chuan nimin khan a pisa-ah HSSLC Examination 2023-a a bial chhung zirlai tiṭhate hnenah lawmpuina citation, pawisa leh lehkhabu a pe. Dr Thangtea chuan zirlaite chu an zir chhunzawm zelna turah duhsakna hlanin, taimak chhuah chhunzawm zel tur leh ram leh hnam tana chhenfakawm ni ngei turin a chah.

Zote khuaah
ASF hri leng

Zote khua, Champhai district chu vawk pul hri, African Swine Fever (ASF) lenna khua (infected area)-ah puan a ni a; Zote khua aṭanga vawk lakchhuah emaw, lakluh emaw phal a ni lo. Vawk thite chinai (lime) nen thuk taka phum tur a ni a, vawk talh leh vawk sa zawrh khap tlat a ni bawk.

Helmet

Mamit SP Lalthangpui Pulamte chuan June 1, 2023 aṭangin Mamit district-ah Bureau of Indian Standards (BIS) in a pawm chin leh a tlukpui helmet ṭha leh him chin khum lote lakah khauh zawka dan lekkawh a nih dawn thu leh satel helmet khum phal a nih loh thu a tarlang.

Green Mizoram Day

Serchhip District Level Committee on Green Mizoram Day chu addl. DC James Lalnithanga hoin nimin khan DC conference hall-ah an ṭhukhawm a; June ni 9 a lo thleng tur Green Mizoram Day hman dan tur an rêl. Serchhip Hmar Venga District Sports Complex chhehvelah thingphun hnatlang neih ni se, an ti.

MT 10 aia rit
tlan khap

Phairuang leh Bunghmun inkar a lei (bailey bridge) chu a hlui tawh avangin Lunglei addl. DC Liansangzuala Chhakchhuak chuan he leiah hian lirthei lian (2 axle vehicle) metric ton 10 aia rit phur tan zawh khap a nih thu a tarlang a, "Lei hi vawi khatah lirthei pakhat aia tamin zawh phal a ni lo. Thupek zawm lote chu IPC Section 188 hmangin hrem theih an ni ang," a ti.

AR-in heroin leh beer man

Assam Rifles sipaite chuan May 24, Nilaini khan Ruantlang, Champhai district-ah ram dang beer bawm 460 an man a, Rs 16,56,000 man a ni. Beer leh a neitua puh chu Champhaia Customs hnenah an hlan. AR sipaite hian May 23, 2023 pawh khan Thenzawl Bazar Vengah heroin gram 92.6 an man a, Rs 64,82,000 hu a ni. Hemi rual hian syringe 120, pawisa fai Rs 2,05,480 leh pawisa lem eng emaw zat an man bawk.