Lalchhandama'n a biala raltlante a tlawh

Tuivawl bialtu MLA Lalchhandama Ralte, minister chuan nimin khan a bial chhung khaw ṭhenkhata Manipur buaina avanga rawn raltlante a tlawh a, anmahni ṭanpuia chhawmdawl turin Mizoram sorkar a inhawng tih a hrilh.

Lalchhandama chuan a bial chhungah hian raltlan 1,200 chuang an awm tih sawiin, "A tam zawkin an chhungte an bèl a, camp a awm ngai eng emaw zat an awm avangin heng mite tan hian khawsakna tur camp sak a ni a, raltlante camp lian ber chu Sakawrdaiah hian sak a ni. Khaw hrang hrangah khawtlang hruaitute, tlawmngai pawlte leh kohhranten an lo kuangkuah hi a lawmawm hle. Sorkar pawhin a theih ang angin chhawm­dawl hna a thawk zel," a ti.

Minister chuan relief camp chu a nuam thei lo tih sawiin, "Khawtlang hruaitute nen a ṭul ang angin ruahmanna siam zel a ni dawn," a ti a, hnathawk thei rualte chuan VC-te berawn chunga a theih ang anga an mamawh tuak nan hna thawk turin a chah a, ṭanpuina atan Rs 20,000 a hlan.