MPYCC-in raltlante ṭanpuina an hlan

Mizoram Pradesh Youth Congress Committee (MPYCC) chuan Manipur aṭanga sahimna zawnga Mizorama rawn lut, Thingdawl leh Rengtekawn-a awm raltlante hnenah nimin khan ṭanpuina eng emaw zat an hlan.

Congress ṭhalaite'n thilpek an hlante chu - buhfai, dailuah, alu, bekang sa, tarpauline, hrukpuan, damdawi, ha nawhna leh sahbawn-te a ni. Manipur raltlan hi Thingdawl Polytechnic hmunah mi 124 leh Rengtekawn Community Hall-ah mi 123 an awm mek.

MPYCC president Laltawnliana chuan, BJP-in hnam leh sakhaw hrang hrang betute inkarah inhuatna leh tharum thawhna politics nasa takin a khel niin a sawi a, "Chumi rah chhuah avang chuan Manipur-ah nasa takin thisen a luang a, nunna tam tak an chân a, Kristiante biak-in tam tak hâl a nih bakah, in leh lo tam tak hâl leh tihchhiat a ni," a ti.

Manipur-ah nasa taka tual­chhung buaina a chhuah laiin Prime Minister berin ngawih a chuh tlat nia sawiin Laltawnliana chuan, "BJP kaihhruai NDA sorkarah hian India ram a him lohzia a tilang. India ram Hindu rama siam tumna kal zel hi kan dan chah a ngai," a ti a; NDA zawmtute chu tute nge an nih hriat a hun tawh thu a sawi.

MPYCC President chuan, "Zo fate hi chhan hrang hrang vangin inṭhen hrang mah ila, thisena kan inzawm tlat avangin intuamhlawm tlat zel tur kan ni. Insuihkhawm lehna tur kawng hi bumboh hle mah se, harsatna kan tawhte hi unau kan nih hlutzia tilangtu ni zel zawk rawh se," a ti.