Mission LiFE pualin bawlhhlawh chhar fai

Mizoram Pollution Control Board (MPCB) leh Aizawl District Education Officer (DEO) pisa chuan nimin zing khan Aizawlah plastic bawlhhlawh chhar fai hnatlang an huaihawt a; Saitual leh Khawzawlah pawh DEO pisa huaihawtin an hnatlang bawk.

Hnatlâng hi sorkar laipuia Mission LiFE programme hnuaiah huaihawt a ni a, Aizawlah chuan zirlai 300 chuang an tel. Chanmari leh Sikulpuikawn aṭanga ṭanin, Vanapa Hall kawtah an intawk khawm a; inkhawm tawi buatsaih niin, plastic bawlhhlawh chungchanga inzirtirna hun hman a ni.

Saitualah chuan zirlai 220 chuang an thawk chhuak a, Khawzawlah zirlai 250 vel an thawk chhuak bawk. An khaw chhunga hmun pawimawha plastic bawlhhlawh an chhar fai bakah, environment tichhe lo tur leh humhim tura thutiam an sawi rual bawk.

Nimin vêk khan MPCB-a thawkte chuan Mizoram Secretariat Complex-a pisa hrang hrangah kalin, an khawl hluihlâwn (e-waste) tawhte an khawn khawm a, Aizawla E-waste Collector Centre Karo Sambhav hnenah an dah a ni.

Mission LiFE hi June 5-a World Environment Day lawmna chi khat atana ruahman a ni a, Mizoram hmun hrang hrangah hman tura ruahman a ni.