Lengpuiah NIT building ṭha tak rei lo teah kan neih thuai ka beisei - MP K Vanlalvena

Govt. Lengpui High School chuan nimin khan an sikul tualah kum 50 an tlin lawmna an buatsaih a, Rajya Sabha MP K Vanlalvena'n a hmanpui. MP chuan, rei loteah NIT building ṭha tak kan neih thuai a beisei thu a sawi.

MP chuan rei loteah Lengpuiah NIT building ṭha tak a awm dawn nia sawiin, "Cheng vbc 700 senna tur NIT Lengpui rama sak mek chu tunah cheng vbc,. 300 vel an hmang tawh. Mah se, a nih tur anga an sak loh avangin complaint ka theh lut a, tunah chuan director fel tak dah a ni tawh. Forest clearance tih fel loh avanga buai pawh department hotute nen Director General-ah kan ti fel ta. Rei loteah NIT building ṭha tak kan neih thuai a beisei thu a sawi.

Sorkar hriatpui damlo emergency-te Lengpui Airport-a ṭumpui theih loh chungchangah Central Aviation lam hotute an dawr thu sawiin K Vanlalvena chuan, "Hetianga airport pali dah zingah kan lo tel a, dilnate kan siam angin rei loteah sorkar hriatpui damlo emergency hruai ngaite tan thu lawmawm kan hre thuai turah kan ngai," a ti.

K Vanlalvena chuan, zirna hi a hlawhtlinna chu zirlai, zirtirtu leh nu leh pate nimah se, mahni hmalam tana hlawhtlinna tak tak chu zirlaite kutah a awm tih a sawi a, "Thil ṭhenkhatin kan hmalam hunte tibahlah thei mah se, theihtawp chhuahtute chu dan rual an ni ngai lo. Zirlaite future-ah hlawhtlinna hi a awm vek a, nu leh pa hausakna emaw, retheihna emaw avangin an hlawhtlinna kawng a bo lo," a ti a, zirlaite chu tunlai khawvel thiamnate hmangthiam turin a chah.

He hunah hian bialtu MLA H Lalzirliana pawhin thu a sawi a, Lengpui HSS pawh Chief Minister leh Education Minister zarah Samagra hnuaiah dah a nih dawn thu leh Lengpui PHC tan Hindustan Petroleum-ten x-ray khawl an bun sak tur thu a sawi.