Silk thar chhuah hmangin chhungkaw 521 chu poverty line chunglamah khai chhuah an ni

Sericulture department chuan nimin khan Bawngkawn Chhim Veng YMA Hall-ah North Eastern Region Textile Promotion Scheme (NERTPS) hnuaia project pathum zirhona kharna hun, ‘Closing Workshop under NERTPS’ an hmang a, Sericulture minister Lalrinawma'n a hmanpui. Ramchhunga silk tharchhuah hmangin chhungkaw inziaklut 2,100 zinga chhungkaw 521-te chu poverty line chunglamah khai chhuah an nih thu tarlan a ni.

Lalrinawma chuan, silk tihhmasawnna scheme - Intensive Sericulture Development Project (ISDP), Integrated Bivoltine Sericulture Development Project (IBSDP), Integrated Muga Silk Development Project (IMSDP)-te chu sorkar laipui ngaihpawimawh an nih thu a sawi a, "India ramah silk hmanna leh mamawhna a sang hle a, silk tharchhuah kawnga intodelh chu ram economy siam nana thil pawimawh tak a ni," a ti.

Khawvel sik leh sa inthlak danglam zelah Mizoram boruak pawh silk, a bikin muga plantation neihna hmun ṭha takah a inher rem tih sawiin Minister chuan, "Mizoramin ram leilung ṭha tak a neih hi hmang ṭangkaia, silk chìn uar zel tur a ṭul," a ti a, leilung nena inzawmna nei eizawnna a nih angin leilung duat thiam a pawimawh tih hriat reng a ngaih thu a sawi.

Sericulture Minister hian NERTPS hnuaia hmalaknate tarlanna ‘Closure Document under NERTPS’ a tlangzarh a, project thar - Eri Development Project, Silk Samagra-2 a hawng nghal a ni. Workshop-ah hian mithiamte'n kalkhawmte chu silk chungchang thupui hrang hrang an zirtir a; silk farmer mi 18 hnenah chawimawina hlan a ni.

He huna tarlan danin, NERTPS hi kum 2014-ah bulṭan a ni a, a hnuaiah hian project hrang hrang ISDP, IBSDP, IMSDP bakah, Aspirational District Mamit châwikân nan ‘Development of Eri-Culture in Mizoram for the Upliftment of Aspirational District’ te a awm.

NERTPS hian kum 6 chhung awhin, kum 2020 thleng khan kalpui a ni a; scheme kaltlang hian silk hmasawnna ruhrel hrang hrang din niin, ramchhunga silk tharchhuah a tihpun bakah, chhungkaw inziaklut 2,100 zinga chhungkaw 521-te chu poverty line chunglamah khai chhuah an ni.