Tlawm taka bawngsa zawrh ṭhinte a thianghlim em tih finfiah an duh

Bawngsa Zuar Multipur­pose Cooperative Society Ltd. (BZMCSL), New Market hruai­tute chuan nimin khan Aizawl Press Club-ah thuthar theh­darhtute kawmin, social media-a tlawm deuh deuha bawng sa zawrh ṭhin chu a thianghlim em tih finfiah ni se an duh thu an sawi.

Tlawm taka bawng sa zawrh chu an tihtawp theih a ni lo tih an hriat thu sawiin BZMCSL hruaitute chuan, "Mah se, he­tianga rate tlawm taka an zuar hi mak kan ti a, hetianga rate tlawma zawrh ve theih hi kan duh hle. Bawng lo kalna hmun Champhai rate hian bawng sa rate tlawma an lo thawn thei ang hian Aizawla bawngsa zuarte hi bawng pum tlawm deuh talin min rawn pe thei se, rate tlawm deuha hralh chhuah theih kan duh hle," an ti.

BZMCSL hruaitute sawi danin, an bawng sa zawrh chu Vety doctor-ten a pumin a him leh him loh uluk takin an endik vek a, a him tawk lo a awm a nih chuan enkawl zui rih a ni ṭhin. Talh a nih hnuah doctor-ten uluk takin an endik leh vek a, chumi hnuah chauh zawrh chhuah ṭhin a ni. Bawng talhtute pawh training pek vek an ni a, an hriselna pawh endik vek a ni. Bawng sa zuartute chu training pek an ni bawk.

Tlawm deuh deuha bawng­sa zawrh ṭhin chu Mizo­ram sorkarin bawng talhna hmun tura a siama talh a ni ve lo nia an hriat thu sawiin, "Khawi hmunah nge talh a nih a, a thiang­hlim leh hlim loh Vety doctor-in an endik em tih kan hre chak hle," an ti.