
Civil Services Examination 2022-ah Mizoram aṭangin tling an awm lo
Union Public Service Commission (UPSC) chuan nimin khan Civil Services Examination 2022 (personal interview) result a tichhuak a, tling mi 933 zingah Mizoram mi an awm lo. UPSC Civil Services Examination-ah hian Ishita Kishore chu pakhatna a ni.
Thu dawn danin, CSE 2022-ah hian Mizoram aṭangin mi pahnih - KC Zalena leh Betty Lalrinfeli te chuan mains exam paltlangin personal interview an hmachhawn a, mahse an tling ta lo a ni. Mizoram pawn lama Zo hnahthlak mi 2/1 tling an awm thung.
Indian Administrative Service (IAS) bikah Mizoram mi tling hnuhnung ber chu Grace Lalrindiki Pachuau (2014) a ni a, ani hnuah hian kum riat chhung chu Mizoram mi tling an awm tawh lo. Grace Lalrindiki hmain kum ruk chhung IAS-ah Mizoram mi tling an awm tawh lo bawk a; ani hmaa tling hnuhnung chu Saidingpuii Sailo niin, kum 2008 batch a ni. Indian Police Service (IPS)-a Mizoram mi tling hnuhnung ber chu kum 1991-ah a tling a, kum 21 chhung tling an awm tawh lo a ni.
Hetih lai hian, CSE 2022-ah hian hriat theih chinah Nagaland mi pali, Arunachal Pradesh mi pathum, Assam leh Manipur aṭangin mi pahnih ve ve an tling thung.