Leader leh CM atana Duhoma pawm lo tan ZPM-ah tel a remchang lo - K Sapdanga

ZPM Aizawl North-II Block chuan nimin khan Tourist Lodge, Chaltlang­ah extended meeting an nei a, an hun hmanpuitu ZPM working president K Sapdanga chuan leader leh chief minister atana Lalduhoma pawm lo tan ZPM-ah tel a remchan loh thu a sawi.

K Sapdanga chuan tunlai hian MNF leh Congress party-in Lalduhoma nena inngeih loh tir an tum thar leh nasa hle tih sawiin, "Eng ang takin nge he thil hi an kalpui lehzel ang tih pawh kan hre lo. Kan lungrualna tichhe tur zawnga min beihna hi ZPM chuan kan nghin phah tur a ni lo," a ti.

Leader atan leh chief minister atana Lalduh­oma pawm lo tan ZPM-a awm a remchang lo tih sawiin ZPM Working President chuan, "Vawiin­ah chiang taka ka sawi duh chu ZPM hi ka chhuahsan a nih ngawt loh chuan Pu Duha leadership hi lungsi takin ka pawm," a ti a, Val Upa Council rorelnaah pawh a lungawi thu a sawi.

K Sapdanga chuan Mizoramah thli a tleh mek tih sawiin, "Chu thli chu ZPM thli a ni. Khawi aṭanga lo tleh ṭan nge pawh kan hre lo. Thingtlang, khawpui leh sorkar hnathawk zingah pawh a tleh mek a ni. Hei hi a chhan nia lang chu sorkar ṭha, kalphung thar mipui sorkar duhna a lian hle tihna a ni. Nuho zingah a tleh a, ṭhalai zingah na takin a tleh mek zel tih chiang takin a lang," a ti.

Opposition ni chungin LMC leh Zemabawk LC inthlanah seat awm zawng zawng lain an solid tih sawiin, "He kan hlawh­tlinnaah hian kan party hi kan uang loa, engmah chhuan tur kan nei lo a ni tih kan hria; min thawhsaktu lam kan hawia, lawmthu kan sawi ringawt mai a ni," a ti a; MLA thlan lo awm turah pawh tlawm tak, lungrual tak leh thawhrimna nen an thawh a ngaih thu a sawi.

Thusawitu dang, Aizawl North II bialtu MLA Dr Vanlalthlana chuan, party dangten ZPM chu midangte tih bei­dawna, an beidawnna chu advantage lak tum angin an puh ṭhin tih sawiin, "An hriat loh chu, beidawn­thlak tak thil a thlen lai pawha beiseina nei tlattu party kan ni tih hi a ni. Kan tu leh fate leh kan thlah kal zel tur tan thil ṭha zawk hnutchhiah turin beiseina kan nei a, chu beiseina tihlawhtling tur chuan nasa takin kan bei mek," a ti.

Dr Vanlalthlana chuan an party leader Lalduhoma chu mi fel famkim an tih loh thu sawiin, "Chutihrual chuan a ni aia ṭha hi vawiinah hian kan ram hruai tur hian kan nei lo a, rinawm takin kan zui zel dawn. Kan hruaitute hi party dangin min la sawisel sak zel dawn," a ti a, party dangte'n an hruaitute an sawiselna chu buaina atana hmang lo turin an party mite a chah.