Mizorama ramngaw leh tuihna humhalhna atan JICA nen nuai 52,500 hu project kalpui dawn

Environment, Forest & Climate Change (EFCC) minister TJ Lalnuntluanga chuan May 1, Thawhṭanni leh nimin khan Serchhip district-a vantlang enkawl ramngaw (community forest)-te a tlawh a; Mizorama ramngaw leh tuihna humhalhna lama hmalakna atan Japan International Cooperation Agency (JICA) nen cheng nuai 52,500 hu project kalpui tum a nih thu a sawi.

TJ Lalnuntluanga chuan, Mizorama ramngaw leh tuihna humhalhna lama hmalakna atan JICA nen cheng nuai 52,500 hu project kalpui tum chungchang sawifiahin, "He project hmang hian tuihna humhalh leh tihpun te, botanical garden ṭha tak tak siamte leh hetiang lam chi hmalakna hrang hrang kalpui tum a ni a, a project cost pawh cheng nuai 52,500 zet a ni dawn. Japan lamin min pawmpui tawh a, sorkar laipui lam pawhin min pawmpui tawh bakah, Mizoram sorkar pawhin min pawmpui tawh. Nakkum March thlaah inremna (agreement) fel fai tak neih hman kan beisei," a ti.

Nimin zing khan EFCC Minister hian North Vanlaiphai DFO pisaah N Vanlaiphai Forest Division chhunga ramngaw humhalh ṭha Branch YMA 12 hruaitute a kawm a, Forest department hmalaknate ṭha taka lo ṭawiawm zel tura sawmin, "Mihringten kan nunna atana kan mamawh ramngaw ṭha taka in lo enkawl ṭhin hi a lawmawm takzet a, lo uar deuh deuh ang che u," a ti a, branch YMA 12 hnenah hian ramngaw humhalhte an lo enkawl zui zel nan Rs 75,000 ṭheuh a hlan a ni.

Thawhṭannia Thenzawl Forest Division chhunga Sailam Ecological Conservation Society-te enkawl Sailam Bird Sanctuary a tlawhnaah EFCC Minister chuan, "Kum 2015 aṭanga mipuiin in lo enkawl tawh Sailam Bird Sanctuary hi a hluin a ropui hle a, a entawn tlak takzet. Khaw dangte pawhin hetiang tihnachang hi hre zel se," a ti.

Sailam khuain eco-tourism leh botanical garden lama theihna leh hmunhma an neihte chu ramngaw tichhe si loa haichhuah thiam a ṭul thu te, hemi kawnga hma la turin sorkar pawh a inpeih reng thute a sawi a; Sailam Bird Sanctuary enkawl zuina atan leh tihchangtlun zel nan Compensatory Afforestation Management & Planning Authority (CAMPA) Fund aṭangin Rs 6,00,000 a hlan nghal.

TJ Lalnuntluanga hian Serchhip Sub Headquarters YMA-in an enkawl Entlang Ramngaw (Entlang Social Forestry) pawh Thawhṭanni vêk khan a tlawh a; thu sawiin, "Forest deparment hmalakna hi department bil pual a ni lo a, khawvel mi tinte mamawh thil ṭul tak a ni. Chutiang taka hlu a nih avang chuan India sorkar pawhin khawpui chhungah ngei ngaw siam - Nagar Van Project (City Forest) a kalpui ta hial," a ti a, Entlang ngaw pawh hi Serchhip khawpui chhunga awm a nih angin Nagar Van Project kalpui nan proposal thehluh mek a nih thu a sawi.

Khawvelin boruak thianghlim a neih zel theih nan carbon credit kalpui ṭhin a nih thu sawiin EFCC Minister chuan, "Ramngaw nei ṭhaten sum tam tak hai luh theihna remchang an nei ṭhin. Hei hi Mizoram pawhin kalpui dan tur kan dap mek a, kan hlawhtlin ngei ka beisei, " a ti a; Compensatory Afforestation Management & Planning Authority (CAMPA) Fund aṭangin Entlang Forestry enkawl zelna tur Rs 3,00,000 a hlan.