World Veterinary Day 2023 hman a ni

Animal Husbandry & Veterinary minister Lalrinawma hoin April 29, 2023 khan Bung Bangla-a Tuma Resort-ah World Veterinary Day 2023 hman a ni a; Day thupui chu 'Promoting Diversity, Equity and Inclusiveness in the Veterinary Profession' tih a ni.

Lalrinawma chuan, AH&Vety department-a thawktute chu mipui tana thawh hlawk tak leh ei leh bar kawnga nasa taka thawk tawh ṭhintu an nih thu a sawi a, "Chutihrual chuan in hnathawhna kawng a piangah mahni mihringpuite hlutna hre reng chungin hma la ṭhin ang che u. In ran enkawlte pawh an hlutna hriat a pawimawh a, mi ranvulhte enkawl sakna kawngah pawh a neitute rilru hriatthiampui a pawimawh," a ti a, eitur atana ran an vulhte pawh a sa thianghlim leh hrisel an chhawp chhuah sak theihna tura uluk taka enkawl a pawimawh thu a sawi.

AH&Vety department chu Mizoram tana department pawimawh leh hlu tak a nih thu sawiin Minister chuan, "Mipuite hnena zirtirna leh hmalakna puanzar kawngah tun aia ṭan lak ni thei se. Chutihrual chuan Pathianin mihring leh thildangte a siam danah ran vulhte laka ngilneihna lan tir tura tih a nih laiin, hmun ṭhenkhatah ran tihduhdahna leh sawisaknate a la thleng ṭhin," a ti a, Animal Welfare Board Chairman a nih angin chutiang thil thleng ṭhin chu pawi a tih thu a sawi bawk.

World Veterinary Day 2023 lawmna inkhawm hi Indian Veterinary Association (IVA) bultuma hman a ni a, IVA president Dr Lalremliana'n a kaihruai. IVA Mizoram Secretary leh Finance Secretary-te'n report an pe a; CVsc&AH assistant professor Dr C Lalmuanthanga leh Oregon Health & Science University, USA researcher Dr Jonathan Lalsiamthara Ralte ten thu an sawi.