Silk Samagra-2 kalphung inhrilhfiahna nei

April 4, Thawhlehni khan Champhai district-a Sericulture project pakhat, sorkar laipuia Ministry of Textile hnuaia Silk Samagra-2 kalpui ṭan mek kalphung leh inkaihhruainate inhrilhfiahna hun buatsaih a ni.

Inhrilhfiahna hun hi Champhai district sericulture officer Hmingthantluangi'n a kaihruai a, Directorate of Sericulture, Aizawl aṭangin deputy director B Lalchhuana, Silk Samagra project coordinator ni bawk leh sericulture scientist Dr Lalthlamuana Pachuau ten an hmanpui a; Silk Samagra-2 project hnuaia pangang khawitute tana hriat tur pawimawhte leh inkaihhruainate an sawifiah a ni.

Sorkar thuchhuah tarlan danin, Champhai district-a Sericulture project kalpui mek hi 'Sustainable livelihood through Ericulture in east Mizoram' tia vuah a ni a, project hnuaiah Champhai district-a chhungkaw 134 hmalakpui ṭan an ni.

Project tum ber chu - Eri maimaw pangang khâwi hmanga kut hnathawktute eizawnna rahbi ṭha zawk siam a ni a; project kalpuina lian leh zau ber tur chu Ngur cluster niin, chhungkaw 56-in hma an la dawn.

Sericulture department hotute chuan Thawhlehni vêk khan Tualcheng khuaa muga pangang khawitute an tlawh a, kumin nipuia Central Silk Board-in Tualcheng muga farmer-te muga pangang khawinaa an rawn puihna tur hmunhmate an enfiah.

Khawvel lum zelah India ram dangah muga maimaw pangang khawi hlawhtlin a har tawh avangin Central Silk Board chuan boruak ṭha zawk Mizoram, a bikin Champhai district-ah beiseina sang tak an neih avangin Tualchengah hian kumin nipui khaw lum laiin muga maimaw pangang khawi beihpui thlâk an tum niin sorkar thuchhuah chuan a tarlang.