Agape Multi-Speciality Hospital thu kal zelah High Court-in Chief Secretary hriattirna a pe
Chanmari, Aizawla Agape Multi-Speciality Hospital kaihhnawih thu kal zelah Gauhati High Court, Aizawl Division Bench chuan Committee on Traffic Management din turin Mizoram Chief Secretary a hriattir a; Agape Multi-Speciality Hospital building chungchang sawifiahna affidavit thehlut turin Aizawl Municipal Corporation (AMC) a hriattir bawk.
Agape Multi-Speciality Hospital building hi Dinary T Azyu ta a ni a, AMC Building Regulations, 2012 zâwm loa sak a nih avangin AMC Enforcement Committee chuan December 5, 2022 khan an lo kalhsak tawh.
Agape Multi-Speciality Hospital chungchangah Gauhati High Court Aizawl Bench-ah suo moto public interest litigation (PIL) a lut a, High Court judge pahnih - Michael Zothankhuma leh Marli Vankung te ṭhutna Bench chuan March 24, 2023 khan thupek (order) a chhuah a ni.
Gauhati High Court chuan Mizoram Chief Secretary chu Committee on Traffic Management din turin a hriattir a, Chief Secretary-in a kaihruai ang. Committee chu Aizawl khawpuia traffic dinhmun leh traffic tâwt lutuk tihziaawm dan kawng zawng tura tih niin, thla hnih chhungin vawi khat tal ṭhukhawm tura tih a ni.
Lirthei neitute'n garage an neih ngeina tura Transport department hmalakna leh dan/kaihhruaina a neihte enfiah pawh Committee tih tur zingah a tel a; motor parking neih chungchanga zirna-in, office, chenna in, sikul, damdawi-in leh sumdawnna hmunte tana dan (rules/guidelines/regulations, etc.) chungchang te, dan thar siam a ṭul leh ṭul loh te, AMC-in parking area a siam/puan hmain Traffic Police ngaihdan lak a nih leh nih lohte zir chiang tura tih a ni bawk.
Suo moto PIL a luh chhan ber, Chanmari (Chaltlang road)-a Multi-Speciality Hospital-in lirthei ke li nei (four wheeler) tan parking a neih loh thu Court thupekah tarlan a ni.
Court thupeka a lan danin, Traffic SP-in affidavit a thehluhah chuan, Multi-Speciality Hospital-in building-ah motor dahna a neih loh avangin a bul kawngpuiah traffic jam a awm phah ṭhin thu te, chu chuan hmun dangte pawh a nghawng zel thu te, kawngpuiah damlote an chhuk a ngai a, chu chu anmahni bakah, kea kal dangte leh kawng hmangtu mi dangte tan a him loh theih thu te, kawngpui a zau tawk loh bakah, kawngpui sirah two wheeler parking a awm thute tarlan a ni.
High Court chuan, Agape Multi-Speciality Hospital chauh ni loin, damdawi-in dangte tan pawh lirthei four wheeler dahna (parking) neih loh chu pawmzam theih a ni lo tih a tarlang a; sikul leh zirna-in, office, chenna-in, sumdawnna hmun leh a dangte pawhin motor parking an neih ngei a ṭul thu a tarlang bawk.
Gauhati High Court chuan, lirthei kaihhnawiha Traffic SP-in thuneihna a neihte leh AMC (Control of Parking & Collection of Parking Fees) Regulations chu insu buai theia a lan thu a tarlang a; AMC-in Aizawl khawpui kawngpui kama parking area a siamin kawngpui a tizím sauh tih tarlangin, "A chhan chu, AMC-in lirtheite ṭha taka an tlân theihna aia sum (revenue) lak luh an ngaih pawimawh zawk vang a ni," a ti.
Mizoram sorkarin Coordination Committee on Traffic Management a lo din tawh a, mahse, a hming chauhin a la awm a, traffic tâwt vanga harsatna chingfel turin hmalakna hun eng emaw ti chhung a nei tawh lo. Hei vang hian Court chuan Committee on Traffic Management din turin Mizoram sorkar a hriattir a; Committee chu a tih turte a chunga tarlan tawhte bakah, Coordination Committee on Traffic Management din tawh tharthawh leh dan tur ngaihtuah tel tura tih a ni.
Court thupeka a lan danin, Committee on Traffic Management-ah chuan department pakua - Home, Police, Transport, PWD (Building), LAD, Land Revenue and Settlement, UDPA, Commerce and Industries leh Information and Public Relations secretary ṭheuh (an aiawh emaw)-te leh AMC leh Mizoram Pollution Control Board secretary-te tel tura tih a ni.
Committee on Traffic Management dinna leh an meeting minutes chu April 18, 2023 ral hmain High Court-ah thehlut tura tih a ni a; thubuai hi Gauhati High Court-in April 18, 2023-ah a ngaihtuah leh dawn a ni.
Thu dawn danin, Agape Multi-Speciality Hospital building hi Dinary T Azyu ta a ni a, AMC Building Regulations, 2012 zâwm loa sak a nih avangin AMC Enforcement Committee chuan December 5, 2022 khan an lo kalhsak tawh.
AMC hotute sawi danin, AMC-in Dinary T Azyu hnenah G6 Residential Building (ground floor bakah chhawng ruk tur) sak phalna a pek laiin, chhawng riatin an sa a, sak zawm tawh lo tura an tih pawhin a sak zawm lui zel a ni.