Berawtlang Tourist Home Annexe hawng

Tourism minister Robert Romawia Royte chuan March 17, 2023 tlai khan Berawtlangah Tourist Home Annexe a hawng a; kum 2022-23 chhungin Tourism department-in budget-ah cheng nuai 1,000 chauh a neih laiin, state budget páwn aṭangin hna thawh nan cheng nuai 10,000 chuang hmuh a nih thu a sawi.

Robert Romawia Royte chuan, Tourism department-in hmasawnna hna thawh nan Mizoram páwn aṭangin sum tam tak a hmuh thu sawiin, "Mizoram Annual Plan 2022-23 a Tourism department sum neih chu cheng nuai 1,000 chauh a nih laiin, Mizoram budget páwn lam aṭangin hmasawnna hna eng emaw zat thawh nan cheng nuai 10,000 chuang kan hmu. Tun hnaiah tourism sector-ah hmasawnna hmuh tur a tam hle a ni," a ti.

Tun hnai kum li chhungin Mizoram Responsible Tourism Policy 2020 te, a kaihhnawih dan leh kaihhruaina ṭul zawng zawng siam zawh a nih thu sawiin Robert Romawia chuan, "Tlawhchhan nghet tak nen Mizoram tourism-in hmasawnna kawng a zawh thei tawh. Hna thawh ṭanna lungphûm tur leh thawh zawh tawhna project hawn tur a tam avangin pisa hawn hun chhung loa programme siam hi a finthlak a, zawngchhang chi a ni," a ti a; tourism industry chungchangah sorkar leh department ṭanpui ṭhin turin mipui a sáwm.

Berawtlanga Tourist Home Annexe hi sorkar laipuia Ministry of Tourism aṭanga hmuh cheng nuai 252.26 hmangin Mizoram PWD-in an sa a, a chhung chei leh hmanruate chu cheng nuai 36.29 séngin Tourism department-in an khawih thung. Mikhual thlen theihna a ni a, khum 36 a awm a ni.