Eirukna do zel ka tum - Lalrindika, MLA

YMA, Bawrai Branch chuan March 18, Inrinni zan khan an din champha vawi 78-na Lallianmawia Pachuau Hall, Bawrai, Zawlnuamah an lawm a, khuallian Lalrindika Ralte, bialtu MLA chuan, eirûkna do zel a tum thu a sawi.

Bawrai Branch YMA president MJ Malsawmzuala kaihhruai inkhawmah Lalrindika Ralte chuan, "Pathianin rem a tih a, Pathian khawngaihna zara ka la dam ve a nih chuan Hachhek bial hmasawnna atan theihtawp ka chhuah zel ang. Eirûkna te, dik lohna te, kut tling loa sum lakte kan dodal zel ang," a ti.

Ram leh hnam siamṭha tak tak turin mahni phak tâwka ṭanrual a ṭul thu sawiin Lalrindika chuan, "Theihtawp chhuahin hma laho ila, inlungruala thawkho turin bial mipui ka sawm a ni," a ti a, Mizo hnam humhalhtu tur chu Mizote an nih thu a sawi.

Lalrindika Ralte chuan mihringin a duh thlanna hmangin a nun a tichhe ṭhin tih sawiin, "Ram leh hnam humhalh tur chuan mahni ṭheuh hi inhumhalh phawt a ngai," a ti.

Inkhawmah hian Bawrai Branch YMA din champha vawi 78-na puala intihsiakna chi hrang hranga ti ṭhate hnenah lawmman sem a ni.