Health Minister-in mamawh a enfiah

Health & Family Welfare minister Dr R Lalthangliana chuan March 18, Inrinni khan Lengpui Airport-a Medical Inspection Room (MI Room) Lengpui damdawi-in leh Lengpui sub-centre a tlawh a, an mamawhte a enfiah.

Health Minister chuan, Lengpui Airport MI Room chu ram dang khualzinte tan a pawimawh thu leh G-20 meeting avanga chei ṭhat a ni chu lawmawm a tih thu a sawi a; thawktute'n tihchangtlun a ngaihna leh an mamawh an thlente chu a ṭul anga bawhzui zel a nih tur thu a hrilh.

Dr R Lalthangliana chuan, Lengpui damdawi-in chu Covid-19 lèn lai aṭang tawhin khualzinte tan Mizoramin a hman ṭangkai em em a nih thu a sawi a, "Nakinah eng hri emaw pawh lo thleng leh thei a ni a, Mizoram tan khualchhàwn damdawi-in pawimawh tak a ni," a ti.

Health Minister hian thawktute kaihhruaiin staff quarters sak ṭhat ngaite a enfiah a, damdawi-in mamawhte chu a hnena thlen zel turin a chah a ni.

Damdawi-in bula isolation ward sak mek chu ṭha leh tlo thei ang bera siam turin a chah a; an sak tawh chin chu a ṭha hlea a hriat thu a sawi bawk.