Khawiva kawng siam dan chhia an ti

Congress party ṭhalai - Mizoram Pradesh Youth Congress Committee (MPYCC) leh Lunglei District Youth Congress Committee (LDYCC)-te chuan, chhim lam tana kawlphetha hmunpui pawimawh Khawiva panna kawng siam mek chu ruahtui vawi khat tla pawh dâwl zo lo tura an ngaih thu an tarlang.

Congress ṭhalaite chuan Khawiva panna kawng siam mek chu March 18, Inrinni khan an enfiah tih sawiin, "Kumin kum tir khan DIET (Melte) pénga aṭanga 132 KV Sub Station, Khawiva thleng blacktop khawih mek chu duhthu a sam lo hle. Balu leh rora phei chu third class pawh tling pha lo a ni a, balu phei chu kawng síra vaivut ang chauh a ni. Kawng siamna hmunah hian a bulṭhutte hi chhêm fai mumal loa vaivut chungah blacktop tih tawp a ni a, kawng an chhûn chhah zawng hi milimetre 10 pawh tling lo a ni," an ti.

Khawiva panna kawng chu sorkarin a ngaihthah thu sawiin, "A siamna atan sum beitham tak a dah hi chhim mipui zah lohna leh inngaihthahna lian tak a ni," an ti a; kawng siam chu an vil zui zel dawn thu an tarlang.

Congress ṭhalaite tarlan danin, Khawiva kawng siam mek chu March 2020-ah hna ṭan a ni a, kawng siam nan cheng nuai 404.19 ruahman a ni.