Forest Minister-in central a dawr; Dampa Tiger Reserve a thawkte hlawh tur Mizoram sorkar pawisa pûk dawn

Environment, Forest & Climate Change minister TJ Lalnuntluanga chuan March 17, 2023 khan Dampa Tiger Reserve in sum a dawn tlai avanga thawktute'n harsatna an tawh mek chungchangah Ministry of Environment, Forest and Climate Change director general of forests CP Goyal, special secretary ni bawk chu New Delhi-ah a kawm.

CP Goyal chuan, finance system thar chungchanga buaina an tawh thu a lo hrilh a, "Mizoram leh Maharastra state bikah mutan kan la nei a, hemi buaipui tur hian Forest officer-te'n National Tiger Conservation Authority kaltlangin hma an lo la anga, sorkar kum kallai tawp (March 2023) hma ngeiin sum tángte pek chhuah a nih ngei theihna nan hma ka lo lâkpui ang che u," a ti.

Vanglaini thudawn danin, March 17, 2023 vêk khan Dampa Assistant Conservator of Forest (ACF) chuan Tiger Protection Force (TPF) hruaitute a kawm a; TPF-te hlawh chu National Tiger Conservation Authority lam aṭanga pek chhuah mai theih a nih rih loh thu sawiin, PCCF in Mizoram sorkara Finance department-ah TPF-te thla ruk hlawh pûk a dil mek thu te, Finance deptt. lam pawhin rem an tih thu te, chawlhkar 2/1 bak nghah a ngaih a rin loh thute a lo hrilh a ni.

Tarlan tawh angin, Dampa Tiger Reserve venhim hna thawktu, Tiger Protection Force (TPF)-te chuan thla ruk hlawh an lâk tawh loh avangin March 1, 2023 aṭang khan tiam chin awm loin hna an chawl a; TPF hruaitute chuan, kum 2021 tawp lam aṭang khan sorkarin hlawh a batsakte chu thla kimin an dawng tawh ngai lo tih an sawi a ni.

Vanglaini palai zawhna chhangin TPF hruaitute chuan, tiamchin awm loa an nawrh chu vawiin aṭangin tihtawp an tum thu an sawi a, "Mizoram sorkarin thla ruk hlawh kan lâk tawh loh kha min pek an tum nia kan hriat avang leh Dampa ngawin a tawrh nasat hmain vawiin aṭang hian venhim hnathawh chhunzawm leh kan tum a ni," an ti a ni.