Kum 4 chhungin sorkar zirtirtu nghet pension 668 an awm, mi 152 lâk a ni P/S & M/S zirtirtu post ruak 2,584 a awm

Kum 2019 aṭanga January 31, 2023 inkarah Mizoram School Education department-a zirtirtu a ngheta thawk pension-a chhuak mi 668 an awm a, zirtirtu a ngheta thawk tur mi 152 chiah lâk a ni. Primary school leh middle school-ah zirtirtu leh headmaster post ruak 2,584 a awm.

School Education department-in RTI Act hmanga zawhna an chhàn danin, January 2019 leh January 31, 2023 inkara sikul zirtirtu a ngheta thawk pension-a chhuak mi 688-te chu primary school zirtirtu 187, middle school zirtirtu 210, high school zirtirtu 98 leh headmaster 74, higher secondary school zirtirtu pariat, Hindi zirtirtu H/S-ah 28 leh M/S-ah mi 83 an ni.

January 2019 leh January 2023 inkarah vêk sorkar sikula a ngheta thawk turin zirtirtu mi 152 lâk a ni a, chu'ngte chu P/S atan mi 94 leh M/S atan mi 58 an ni. Education department chuan, zirtirtu a ngheta lâk zingah advertisement chhuah loa lak an awm lo niin a tarlang.

Hetih lai hian, School Education department-a zirtirtu a nghet loa muster roll-a thawk tur mi 1,735 lâk a ni thung a; chu'ngte chu P/S-ah mi 817, M/S-ah mi 63 leh, Hindi zirtirtu M/S leh H/S atan mi 855-te an ni.

MNF kaihhruai sorkar flagship programme Socio Economic Development Programme (SEDP) hnuaia thawk turin zirtirtu mi 701 lak a ni tawh bawk a, chu'ngte chu P/S atan mi 337, M/S atan 122, H/S atan 230 leh HSS atan mi 12 an ni.

Mizoram sorkar sikula zirtirtu a ngheta thawk tur, a nghet lo (MR)-a thawk tur leh SEDP hnuaia lâk zawng zawng chu mi 2,588 (152+1735+701) an tling.

Sorkar sikula thawk tur zirtirtu SEDP hnuaiah lâk a niha buaipuitu zawhna chhángin School Education department SPIO chuan, "School Education department-in a buaipui lo a, Human Resource Development Board-te'n an buaipui ṭhin," a ti.

December 2022 dinhmun angin, Mizoram sorkar sikulah zirtirtu post ruak 2,584 a awm tih School Education SPIO-in a tarlang a; P/S leh M/S post ruakte chu tun hnaiah chuan hnawhkhah tumna a awm lo tih tarlangin, "DPAR-in phalna min pek hunah chauh hnawhkhah theih a ni ang," tiin a tarlang.

SPIO tarlan danin, Mizoram sorkar primary school-ah zirtirtu post ruak 1,118 leh headmaster post ruak 255 a awm a, a vaiin 1,373 a ni a; middle school-ah zirtirtu post ruak 1,108 leh headmaster post ruak 103 a awm a, a vaiin 1,211 a ni. P/S leh M/S zirtirtu lak hnuhnun ber ṭum chu May 14, 2019 a ni.

School Education department chuan January 2019 aṭanga January 2023 thlengin IV Grade (PE) mi 54, date entry operator pakhat leh circle education officer pariat lak a nih thu an tarlang bawk.