Pawl pakuain Thisen unit 483 an pe

March 18, Inrinni khan Mizorama blood bank hrang hrangah pawl pakuain thisen unit 483 an pe.

Civil Hospital Aizawl tan Adventist Youth Fede­ration (AYF) chuan blood bank-ah kalin Global Youth Day pualin thisen unit 147 pein, petute mipa 127 leh hmeichhia 20 an ni a; Thinghlun Welfare, Aizawlin blood bank-ah kalin unit 12 an pe. PYD (Mizoram) chuan Central YMA Hall-ah thisen pek an huaihawt a, unit 121 pein, petute mipa 93 leh hmeichhia 28 an ni a; ṬKP, Aizawl Central Bial-in unit 46 an pe a, petute mipa 35 leh hmeichhia 11 an ni.

KṬP, Khatla South Branch chuan an branch ruby jubilee pualin an kohhran hall-ah Synod Hospital tan unit 40 pein, petute mipa 36 leh hmei­chhia pali an ni a; YMA, Aibawk Branch pawhin an khuaah ZMC tan unit 69 an pe a, petute mipa 57 leh hmeichhia 12 an ni.

Global Youth Day pualin AYF, Kolasib Bialin Kolasib District Hospital tan unit 25 pein, petute mipa 15 leh hmeichhia 10 an ni a; AYF, Serchhip Bialin Serchhip District Hospital-ah unit 8 an pe. Lungleiah pawh AYF-te'n thisen an pe a, an pek zat hriat a ni lo.

KṬP, Champhai Veng­thar Branch-in Champhai District Hospital tan unit 15 an pe a, petute mipa 12 leh hmeichhia pathum an ni.