ZPM-in Robert Romawia bàn tura an ngenna Governor-in Election Commission-ah a thawn; "MLA aṭanga bàn ngawt theih ka ni lo" - RRRa

ZPM party-in Representation of the People Act, 1951 (RP Act) Section 9(A) bawhchhiaah Robert Romawia Royte puh a, minister/MLA aṭanga bàn tura Governor an ngenna chu Governor Dr Hari Babu Kambhampati chuan March 16, 2023 khan Election Commission of India (ECI)-ah a thawn. Robert Romawia chuan, ZPM thil tih chu thu dik lan chhuahna tur a nih thu leh MLA aṭanga bàn ngawt theih a nih loh thu a sawi.

Secretary to Governor V Lalsangliana chuan March 16, 2023 khan ECI principal secretary SB Joshi hnenah lehkha thawnin- ZPM Vigilance Department general secretary SL Ngursailova Sailo-in Robert Romawia Royte bàn tura a ngennate chu thawn chhâwng an nih thu leh, lo zir chiang a, an ngaihdante sawi leh turin a ngen a ni.

Tarlan tawh angin, ZPM chuan SL Ngursailova hmingin February 28, 2023 khan Governor hnenah lehkha an thehlut a, minister/ MLA aṭanga Robert Romawia Royte bàn turin an ngen a ni.

SL Ngursailova Sailo chuan, "Pu Robert Romawia Royte hian RP Act, 1951 bawhchhiain, dik lo takin a thuneihna hmangin hlâwkna a tèl (office of profit) avangin ZPM chuan Constitution of India Article 192(1) thuneihna hmanga disqualify turin Governor kan ngen a ni," a ti.

Hetih lai hian Robert Romawia chuan, Assembly session-a ZPM Leader-in ngaihdam a dil zan aṭangin ZPM-te'n amah beiin an ûm zui nasa hle nia sawiin, "MLA aṭanga bàn tura Governor-a min hêk pawh hi Assembly session nghawng zel kha niin alang," a ti.

Robert Romawia chuan, tih dan phung pangngaiin ZPM ngenna chu ECI-ah thawn a nih hmel nia sawiin, "Ṭul an tih chuan ECI chuan ka comment-te pawh an rawn dil ve mai thei e. Pathian zarah dan bawhchhiat ka nei lo a, MLA aṭanga bàn ngawt theih ka ni lo," a ti a; thu dik a lang mai tura a ngaih thu a sawi.

ZPM tarlan danin, Robert Romawia hi North East Consultancy Services (NECS) neitu a ni a, chhiah pawh GST hnuaiah return a la file a ni. NECS chu duhsakna uchuak tak hmangin Mizoram sorkara District Council & Minority Affairs department nen single source selection hmangin deed of agreement an ziak a; NECS chu proprietorship, mimal sumdawnna a nih angin, a neitu leh hlâwkna têltu chu Robert Romawia a ni.

Assembly House-ah Robert Romawia'n NECS chu a fapa ta anga a sawi chungchangah ZPM chuan, "Election affidavit-ah a fapa hi amaha innghat (dependent) a ni tih a tarlang. Electoral roll thar berah pawh chhungkaw khat, in khata chêng an ni tih a lang. Mizo Customary Law hnuaiah a fapa hi indang a la nih loh avangin a fapa ta anga a sawi pawh hi a nihna takah chuan thuneitu leh enkawltu chu Minister of State hi a ni tih a chiang hle," an ti.

"Heng zawng zawng en hian, Minister of State hian a thutiam bawhchhiain a thuneihna hmangin sorkar aṭangin hlâwkna a tél ngei a ni tih a tarlang," tiin ZPM chuan, minister/ MLA a nihna aṭanga Robert Romawia bàn turin Governor an ngen a ni.