SSA hnuaia zirtirtute dah nghet turin Court-in Mizoram sorkar a hriattir

Gauhati High Court Aizawl Bench chuan SSA hnuaia zirtirtu, Mizoram SSA Teachers' Assoction (MSSTA) member-te chu state sorkarah dah nghet turin Mizoram sorkar a hriattir.

Thu dawn danin, MSSTA hian SSA zirtirtute Mizoram sorkarah dah ngheh an nih theih nan kum 2018 khan High Court-ah an zualko tawh a, High Court-in ngaihtuah zui mah se, thuremna mumal awm loin thubuai tihtawp a ni.

MSSTA chuan September 18, 2019 khan Gauhati High Court Aizawl Bench-ah petition an thehlut nawn leh a, hun eng emaw chen ngaihtuah a nih hnuah Gauhati High Court judge Justice Nelson Sailo chuan nimin khan thutlukna siamin, SSA hnuaia zirtirtu, MSSTA member-te chu Mizoram sorkara School Education department-a middle school leh primary school-a zirtirtu post ruakah dah nghet turin Mizoram sorkar a hriattir ta a ni.

Judgement-a tarlan danin, SSA (tunah Samagra Shiksha) hnuaia zirtirtute hlawh chu thla khatah primary school-ah Rs 20,000 leh M/S-ah Rs 25,000 a ni a, hamṭhatna dang a awm lo.

Hetih lai hian, sorkar ukil Mary L Khiangte chuan SSA hnuaia zirtirtute chu kum khat atan lâk an nih ṭhin thu te, advertisement-ah pawh dah ngheh phût phalsak an ni lo tih tarlan a nih thu te, an appointment order-ah pawh contract basis-a lâk an nih thu leh dah ngheh phût theih a ni lo tih tarlan a nih thu te, hna an zawm hmain intiamna an neih thute Court a hrilh.

Petition thehluttute ukil leh sorkar ukil thute ngaihtuah a nih hnuah High Court Judge chuan thutlukna siamin, MSSTA member-te chu sorkar sikula post ruak awm dan ang zel leh an experience leh qualification azirin dah ngheh an nih theih nan hma la turin a hriattir a ni. Court thutlukna chu thla ruk chhunga tihlawhtling tura tih a ni bawk.

MSSTA chuan, Gauhati High Court thutluknaah an lawm thu tarlangin, "Court judgement a rawn chhuak a, judgement hlawhtlinna atan kan hmalakna kan ṭan dawn chauh tihna a ni ve thung. Sorkar lamin hma a lâkna lam hi kan innghahna lian tak pakhat a ni reng rih dawn a, kan sorkar hruaitu leh hotute pawhin chak taka hma min laksak kan beisei tak meuh a ni," an ti.

MSSTA hruaitute hnen aṭanga thu dawn danin, tun dinhmunah MSSTA-ah member mi 1,206 an awm mek. RTI Act hmanga zawhna December 7, 2022-a chhannaa a lan danin, School Education department-ah zirtirtu post (regular) ruak primary school-ah 1,118 leh middle school-ah 1,108 a awm a ni.