OMB hmangin sum pûk a ni leh dawn; cheng vbc. 1,315 pûkna tur a ni

Mizoram sorkar chuan open market borrowing (OMB) hmangin loan cheng vbc. 125 a pûk leh dawn a, a hmaa a lo pûk tawh nen sorkar kum kal mek 2022-23 chhungin cheng vbc. 1,315 a pûkna tur a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; RBI chuan OMB hmanga Mizoram sorkarin sum pûk tur a zawn thu March 10, 2023 khan a tarlang.

OMB hmanga sum pûk a nih theih nan RBI-in state sorkar tan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan nimin, March 14 thleng chhànna hun a hawng.

OMB hmanga sum pûk chu kum khatah a pung vawi hnih rulh tur a ni a, kum 10-15 velah sum pûk zawng zawng rulh a ngai a; a punna chu 7-8% vel a ni.

Hriat theih chinah, sorkar kum kal mek chhungin Mizoram sorkar chuan OMB hmangin ṭum kua loan a pûk tawh a, a pûk tawh zat belh khawm chu cheng vbc. 1,190 a tling. Tunah hian cheng vbc. 125 a pûk leh a nih chuan financial year 2022-23 chhungin cheng vbc. 1,315 a pûk dawn a ni.

February 13, 2023-a Finance department hotute sawi danin, sorkar kum kal mek 2022-23 chhungin Mizoram sorkar chuan OMB hmanga sum pûk RBI-in a phalsak zat chu a tìrah cheng vbc. 990 a ni a, a hnuah thla thum January-March, 2023 atan cheng vbc. 320 pûk belh a phalsak leh a ni.

Kum 2022-23 chhunga Mizo-ram sorkar tana RBI-in sum puk a phalsak zat chu vbc 1,310-ah a pung a ni. Hetihlai hian, puk belh ni tawh lo mah se, kum 2022-23 chhunga OMB hmanga Mizoram sorkarin sum a puk zat chu 1,315 a tling dawn.